স্প’ৰ্টছ ডেস্ক, ২৯ জুলাই: ২০২৪ চনৰ পেৰিছ অলিম্পিকৰ তৃতীয় দিনতো ভাৰতীয় শ্বুটাৰৰ উৎকৃষ্ট প্ৰদৰ্শন অব্যাহত আছে । সোমবাৰে ভাৰতৰ তাৰকা শ্বুটাৰ মনু ভাকৰ আৰু সৰবজোৎ সিঙৰ যুটিয়ে ১০ মিটাৰ এয়াৰ পিষ্টল মিক্সড শাখাত ব্ৰঞ্জৰ পদক মেচৰ বাবে যোগ্যতা অৰ্জন কৰে ।
কোৰিয়ান শ্বুটাৰ চেৰ পেলাই তৃতীয় স্থান দখল ভাৰতৰ:
মনু ভাকৰ আৰু সৰবজোৎ সিঙৰ যুটিয়ে প্ৰতিযোগিতাখনৰ উজ্জ্বল প্ৰদৰ্শন আগবঢ়াই ৩ ছিৰিজত ৫৮০ পইণ্ট সংগ্ৰহ কৰি অৰ্হতা ৰাউণ্ডত তৃতীয় স্থান দখল কৰে । ভাৰতীয় দলটোৱে কোৰিয়া ৰিপাব্লিকৰ অহ য়ে জিন আৰু লি ৱনহ’ যুটিক পিছ পেলায় । কোৰিয়া ৰিপাব্লিকে চাৰি নম্বৰত সামৰণি মাৰে ৷
লগতে পঢ়ক:ইতিহাস ৰচিলে মনু ভাকৰে : ভাৰতৰ হৈ ব্ৰঞ্জৰ পদক লাভ কৰা প্ৰথমগৰাকী মহিলা শ্বুটাৰ - paris olympics 2024
মঙলবাৰে অনুষ্ঠিত হ’ব ব্ৰঞ্জৰ পদক মেচ:
ভাৰতীয় শ্বুটাৰদ্বয়ে কোৰিয়াৰ অহ য়ে জিন আৰু লি ৱনহ’ৰ যুটিৰ বিৰুদ্ধে ব্ৰঞ্জৰ পদক মেচত প্ৰতিদ্বন্দ্বিতা কৰিব লাগিব । মঙলবাৰে ভাৰতীয় সময় অনুসৰি দিনৰ ১ বজাত দুয়োটা দলে ব্ৰঞ্জৰ পদক মেচত মুখামুখি হ’ব । দেওবাৰে পেৰিছ অলিম্পিকত ভাৰতক প্ৰথমটো পদক প্ৰদান কৰা মনু ভাকৰে এই মেচত দ্বিতীয়টো ব্ৰঞ্জৰ পদক লাভ কৰিবলৈ চেষ্টা কৰিব ।
তুৰস্ক আৰু ছাৰ্বিয়াৰ মাজত হ’ব স্বৰ্ণ পদকৰ মেচ:
ইফালে, ২০২০ চনৰ টকিঅ’ত ভাৰতে স্থাপন কৰা ৫৮২ পইণ্টৰ অলিম্পিকৰ অৰ্হতাৰ অভিলেখ স্পৰ্শ কৰে তুৰস্কৰ চেভাল ইলয়দা তাৰহান আৰু ইউছুফ ডিকেকৰ যুটিয়ে ৷ স্বৰ্ণ পদকৰ খেলখনত তুৰ্কী দলটোৱে ছাৰ্বিয়ান যুটি জোৰানা অৰুনোভিচ আৰু ডামিৰ মাইকৰ বিৰুদ্ধে অৱৰ্তীণ হ’ব । প্ৰতিয়োগিতাখনৰ খিতাপ যাৰ নামতেই নহওক কিয়, দুয়োটা যুটিয়ে ইতিমধ্যে পেৰিছ ২০২৪ত পদক নিশ্চিত কৰিছে ।
লগতে পঢ়ক:জুনিয়ৰ চেম্পিয়নৰ পৰা পেৰিছ অলিম্পিক ২০২৪ লৈ: ছ’চিয়েল মিডিয়াত নিজৰ মনৰ ভাব ব্যক্ত কৰিলে মনুৱে - Paris Olympics 2024
