স্প’ৰ্টছ ডেস্ক: মঙলবাৰে টেষ্ট ক্ৰিকেটৰ পৰা অৱসৰ গ্ৰহণ কৰে নিউজিলেণ্ডৰ ফাষ্ট বলাৰ টিম চাউথীয়ে ৷ 36 বছৰীয়া চাউথীয়ে হেমিল্টনত কেৰিয়াৰৰ শেষৰখন টেষ্ট মেচত ইংলেণ্ডৰ বিৰুদ্ধে অংশগ্ৰহণ কৰে ৷
দীৰ্ঘদিন ধৰি কিৱি বাহিনীৰ ফাষ্ট বলিঙৰ নেতৃত্ব দিয়া এই বলাৰগৰাকীক স্মৰণীয় জয়ৰে বিদায় দিয়ে সতীৰ্থই ৷ কিয়নো মঙলবাৰে ইংলেণ্ডৰ বিৰুদ্ধে টেষ্টত 423 ৰাণত সৰ্ববৃহৎ জয় সাব্যস্ত কৰিছিল নিউজিলেণ্ডে ৷
টেষ্টত(ৰাণৰ ক্ষেত্ৰত) নিউজিলেণ্ডৰ সৰ্ববৃহৎ জয়
টেষ্ট ৰাণৰ ক্ষেত্ৰত এয়া নিউজিলেণ্ডৰ সৰ্ববৃহৎ জয় । ইংলেণ্ডে ইতিমধ্যে তিনিখন মেচৰ শৃংখলাৰ প্ৰথম দুখনত জয় লাভ কৰি 2-1 ব্যৱধানত দখল কৰিছে শৃংখলাটো ৷ ইংলেণ্ডে প্ৰথমখন মেচত 8 উইকেটত আৰু দ্বিতীয়খন মেচত 323 ৰাণত জয়লাভ কৰে । নিউজিলেণ্ডৰ জয়ে দলটোক বিশ্ব টেষ্ট চেম্পিয়নশ্বিপৰ পইণ্ট তালিকাৰ চতুৰ্থ স্থানত উপনীত হোৱাত সহায় কৰে ৷
টিম চাউথীৰ টেষ্ট কেৰিয়াৰ
চাউথীয়ে 2008 চনত মেকলিন পাৰ্কত ইংলেণ্ডৰ বিৰুদ্ধে টেষ্ট অভিষেক কৰিছিল । একেটা দলৰ বিৰুদ্ধে কেৰিয়াৰৰ অন্তিমখন টেষ্টো খেলে এইগৰাকী ক্ৰিকেটাৰে । অন্তিমখন টেষ্টত টিম চাউথীয়ে প্ৰথম ইনিংছত 11 অভাৰত 46 ৰাণ ব্যয় কৰাৰ পিছতো লাভ নকৰিলে কোনো উইকেট ৷ অৱশ্যে, এই ইনিংছত বেট ধৰি চাউথীয়ে 10 টা বলত 3 টা ছয়ৰে সংগ্ৰহ কৰে 23 ৰাণ ৷
মেচখনৰ দ্বিতীয় ইনিংছৰ 8 অভাৰত চাউথীয়ে 34 ৰাণত দখল কৰে দুটা উইকেট ৷ ক্ৰিকেটাৰগৰাকীৰ কেৰিয়াৰত তেওঁ 107 খন টেষ্টত 30.26 গড়ে 391 টা উইকেট দখল কৰাৰ কৃতিত্ব অৰ্জন কৰে । টিম চাউথীয়ে 161 খন এদিনীয়া আৰু 123 খন টি-20 তো অংশগ্ৰহণ কৰিছে ৷
চাউথীয়ে এদিনীয়া কেৰিয়াৰত দখল কৰিছিল 221 টা উইকেট । তেওঁ 125 খন আন্তঃৰাষ্ট্ৰীয় টি-20 মেচত 22.17 গড়ৰ সৈতে 164 টা উইকেট দখল কৰিছিল । চাউথীয়ে 54 খন আই পি এল মেচ খেলি 47 টা উইকেট দখল কৰিছিল ।
ফাষ্ট বলাৰজনে তেওঁৰ কেৰিয়াৰৰ সময়ছোৱাত তিনিওটা ফৰ্মেটতে নিউজিলেণ্ডক নেতৃত্ব দিছিল ৷ অৱশ্যে ক্ৰিকেটাৰগৰাকীয়ে এতিয়াও বগা বলৰ ফৰ্মেটৰ ক্ৰিকেটৰ পৰা অৱসৰ লোৱাৰ সিদ্ধান্ত গ্ৰহণ কৰা নাই ৷
ইংলেণ্ডক 423 ৰাণত পৰাস্ত নিউজিলেণ্ডৰ
হেমিল্টনত অনুষ্ঠিত তৃতীয় টেষ্ট মেচখনত 658 ৰাণৰ লক্ষ্য অনুসৰণ কৰা ইংলেণ্ডে দ্বিতীয় ইনিংছত 234 ৰাণত আউট হয় । দলটোৰ হৈ জেকব বেথেলে 76 ৰাণ আৰু জ’ ৰুটে 54 ৰাণ সংগ্ৰহ কৰে । নিউজিলেণ্ডৰ হৈ মিচেল চেণ্টনাৰে 4 টা উইকেট আৰু মেট হেনৰী আৰু টিম চাউথীয়ে দুটাকৈ উইকেট দখল কৰে ।
আনহাতে, নিউজিলেণ্ডে প্ৰথম ইনিংছত 347 ৰাণ আৰু দ্বিতীয় ইনিংছত 453 ৰাণ সংগ্ৰহ কৰিছিল । ইংলেণ্ডৰ দলটো প্ৰথম ইনিংছত 143 ৰাণত আউট হৈছিল । নিউজিলেণ্ডৰ মিচেল চেণ্টনাৰক মেন অৱ দ্য মেচ হিচাপে বিবেচিত কৰাৰ বিপৰীতে ইংলেণ্ডৰ হেৰী ব্ৰুকক মেন অৱ দ্য চিৰিজৰ বঁটা প্ৰদান কৰা হয় ৷
লগতে পঢ়ক:423 ৰাণৰ বৃহৎ ব্যৱধানৰে নিউজিলেণ্ডৰ বিৰুদ্ধে পৰাস্ত ইংলেণ্ড
