মুম্বাই :ভাৰতীয় ক্ৰিকেট নিয়ন্ত্ৰণ ব'ৰ্ডে (বি চি চি আই) পাকিস্তানত অনুষ্ঠিত হ'বলগীয়া চেম্পিয়নছ ট্ৰফী ২০২৫ৰ বাবে ১৫ জনীয়া দলটো শনিবাৰে ঘোষণা কৰিছে । এই চেম্পিয়নছ ট্ৰফীত অভিজ্ঞ ৰোহিত শৰ্মাই পুনৰ এবাৰ দলক নেতৃত্ব দিব । ইফালে ফাষ্ট বলাৰ মহম্মদ ছামীয়ে প্ৰত্যাৱৰ্তন কৰিছে । একেদৰে পিঠিত আঘাত পোৱা স্বত্বেও তাৰকা ফাষ্ট বলাৰ যশপ্ৰীত বুমৰাহক দলত অন্তৰ্ভুক্ত কৰা হৈছে ।
চেম্পিয়নছ ট্ৰফীৰ বাবে ভাৰতীয় দল ঘোষণা
যুৱ বেটছমেন শুভমন গিলক এই গুৰুত্বপূৰ্ণ প্ৰতিযোগিতাৰ বাবে উপ-অধিনায়ক হিচাপে নিযুক্তি দিয়া হৈছে । দলটোত ৰোহিত শৰ্মাক খেলৰ আৰম্ভণিতে সমৰ্থন কৰিবলৈ যশস্বী জয়ছোৱাল আৰু শুভমন গিলৰ দৰে দুগৰাকী যুৱ বেটছমেনক দলৰ বাবে বাছনি কৰা হৈছে ।
দলত দুই উইকেটকীপাৰ-বেটছমেন অন্তৰ্ভুক্ত
বি চি চি আয়ে ঘোষণা কৰা এই দলটোত ২ জন উইকেটকীপাৰ বেটছমেন ক্ৰমে ঋষভ পন্ত আৰু কে এল ৰাহুল অন্তৰ্ভুক্ত আছে । ইফালে বিৰাট কোহলী, কে এল ৰাহুল আৰু শ্ৰেয়স আয়াৰৰ দৰে তাৰকা বেটছমেনসকলে মিডল অৰ্ডাৰ চম্ভালিব ।
ফাষ্ট বলাৰৰ নেতৃত্ব ল'ব যশপ্ৰীত বুমৰাহে
বুমৰাহে অষ্ট্ৰেলিয়াৰ বিৰুদ্ধে যোৱা ছিডনী টেষ্টত পিঠিত আঘাত পাইছিল । ইয়াৰ স্বত্বেও তেওঁক ভাৰতীয় দলত অন্তৰ্ভুক্ত কৰা হৈছে, যাৰ অৰ্থ হৈছে তেওঁৰ আঘাত অত্যধিক গুৰুতৰ নহয় । বুমৰাহে এই প্ৰতিযোগিতাখনত পেচ আক্ৰমণৰ নেতৃত্ব দিব । য'ত মহম্মদ ছামী আৰু অৰ্শ্বদীপৰ সম্পূৰ্ণ সমৰ্থন থাকিব ।
৩ স্পিনাৰে দলত পালে স্থান
চেম্পিয়নছ ট্ৰফীত ভাৰতে ডুবাইত সকলোবোৰ মেচ খেলিব । য'ত পিটছবোৰ স্পিন বলাৰৰ বাবে সহায়ক । সেই কথা মনত ৰাখিয়ে দলটোৱে ৩ জন স্পিনাৰক দলত অন্তৰ্ভুক্ত কৰিছে । স্পিনাৰ কুলদীপ যাদৱে স্পিন বলাৰসকলক নেতৃত্ব দিব । দলত অন্তৰ্ভুক্ত আন দুজন তাৰকা স্পিনাৰ হৈছে ক্ৰমে ৰবীন্দ্ৰ জাদেজা আৰু অক্সৰ পেটেল ।