স্প’ৰ্টছ ডেস্ক, 13 ছেপ্টেম্বৰ: পেৰিছ অলিম্পিক 2024 ৰ ব্ৰঞ্জ পদক বিজয়ী ভাৰতীয় পুৰুষ হকী দলে চীনত অনুষ্ঠিত হোৱা এছিয়ান চেম্পিয়নছ ট্ৰফী 2024 ত অব্যাহত ৰাখিছে সুন্দৰ প্ৰদৰ্শন ৷ দলটোৱে বৰ্তমানলৈকে চাৰিখনকৈ খেলত অংশগ্ৰহণ কৰি আটাইকেইখন খেলতে জয় লাভ কৰিছে ৷ ইতিমধ্যে প্ৰতিযোগিতাৰ ছেমি ফাইনেলত স্থান নিশ্চিত কৰিছে ভাৰতে ৷
ভাৰতে শনিবাৰে অনুষ্ঠিত হ’বলগীয়া দলটোৰ পৰৱৰ্তী খেলখনত মুখামুখি হ’ব চিৰপ্ৰতিদ্বন্দ্বী পাকিস্তানৰ বিৰুদ্ধে ৷ হাই প্ৰফাইল খেলখনৰ সন্দৰ্ভত কিছু কথা এই প্ৰতিবেদনত আগবঢ়োৱা হ’ল ৷
প্ৰতিযোগিতাখনত দুয়োটা দলৰ প্ৰদৰ্শন
হৰমনপ্ৰীত সিঙৰ নেতৃত্বাধীন ভাৰতীয় পুৰুষ হকী দলে চলিত এছিয়ান চেম্পিয়নছ ট্ৰফী 2024 ত সুন্দৰ প্ৰদৰ্শন আগবঢ়াইছে । ভাৰতে আয়োজক দেশ চীনৰ বিৰুদ্ধে 3-0 গ’লৰ জয়েৰে অভিযান আৰম্ভ কৰি পৰৱৰ্তী সময়ত জাপান, মালয়েছিয়া আৰু দক্ষিণ কোৰিয়াক পৰাস্ত কৰে ৷
জাপানৰ বিৰুদ্ধে 5-1 গ’লত, মালয়েছিয়াৰ বিৰুদ্ধে 8-1 গ’লত আৰু পৰৱৰ্তী খেলখনত দক্ষিণ কোৰিয়াৰ বিৰুদ্ধে 3-1 গ’লত ৰোমাঞ্চকৰ জয় লাভ কৰে ভাৰতে ।
আনহাতে, এই প্ৰতিযোগিতাৰ পইণ্ট তালিকাত দ্বিতীয় স্থানত আছে পাকিস্তান ৷ দলটোৱে খেলা চাৰিখন খেলৰ ভিতৰত দুখনত এতিয়ালৈকে জয়ী হৈছে । পাকিস্তানে মালয়েছিয়াৰ বিৰুদ্ধে 2-2 ত অমীমাংসিতভাৱে তেওঁলোকৰ অভিযান আৰম্ভ কৰিছিল ৷
পৰৱৰ্তী সময়ত কোৰিয়াৰ বিৰুদ্ধেও দলটোৱে অমীমাংসিতভাৱে খেল খেলে । অৱশ্যে পাকিস্তানে শেহতীয়া দুখন খেলত যথেষ্ট উন্নতি দেখুৱাইছে । তেওঁলোকে জাপানক 2-1 গ’লত পৰাস্ত কৰাৰ লগতে আয়োজক চীনক 5-1 গ’লত পৰাস্ত কৰে ।