নগাঁও, 6 মাৰ্চ: কাজিৰঙা লোকসভা সমষ্টিৰ বিজেপি প্ৰাৰ্থী কামাখ্যা প্ৰসাদ তাছাক পুনৰ এবাৰ বিজেপিৰ ফুটবল আখ্যা দিলে ৰাইজৰ দলৰ বিধায়ক অখিল গগৈয়ে । নগাঁৱত উপস্থিত হৈ তাছাৰ সমান্তৰালভাৱে শাসকীয় দলটোক কটাক্ষ কৰে গগৈয়ে ৷ বুধবাৰে নগাঁৱত উপস্থিত হৈ যোৰহাট লোকসভা সমষ্টিৰ প্ৰাৰ্থী গৌৰৱ গগৈ হ’ব বুলি ইংগিত দিলে বিৰোধী ঐক্যমঞ্চৰ নেতা অখিল গগৈয়ে ।
যোৰহাট লোকসভা সমষ্টিৰ পৰা গৌৰৱ গগৈক প্ৰক্ষেপ কৰিলে নগাঁৱৰ প্ৰাৰ্থী কংগ্ৰেছ নেতা প্ৰদ্যুৎ বৰদলৈ হোৱাটো একপ্ৰকাৰ নিশ্চিত বুলিয়েই ইংগিত বহন কৰিছে অখিল গগৈৰ মন্তব্যত । নগাঁও লোকসভা সমষ্টিৰ বিজেপি প্ৰাৰ্থী সুৰেশ বৰাক তীব্ৰ কটাক্ষ কৰে বিধায়ক অখিল গগৈয়ে । নগাঁও লোকসভা সমষ্টিত বিজেপি পৰাজিত হোৱাৰ উমান পাই বিজেপি নেতাক প্ৰাৰ্থিত্ব দিয়াৰ বিপৰীতে ন বিজেপি নেতা সুৰেশ বৰাক মুখ্যমন্ত্ৰী ড৹ হিমন্ত বিশ্ব শৰ্মাই প্ৰাৰ্থিত্ব দিছে বুলি অভিযোগ তোলে গগৈয়ে ।