গুৱাহাটী: গুৱাহাটীত ভূমিহীনৰ বাবে চৰকাৰে এক সু-খবৰ কঢ়িয়াই আনিছে । গুৱাহাটীত ভূমিহীন লোকক কম প্ৰিমিয়ামত মাটিৰ বন্দৱস্তি দিয়াৰ বাবে মঙলবাৰে ৰাজ্যিক কেবিনেটত গুৰুত্বপূৰ্ণ সিদ্ধান্ত গ্ৰহণ কৰা হয় ।
মুখ্যমন্ত্ৰী হিমন্ত বিশ্ব শৰ্মাৰ সভাপতিত্বত অনুষ্ঠিত কেবিনেট বৈঠকৰ সিদ্ধান্তমৰ্মে মিছন বসুন্ধৰা ৩.০ জৰিয়তে গুৱাহাটীৰ ভূমিহীন আবেদনকাৰীয়ে কম প্ৰিমিয়ামতে মাটিৰ বন্দৱস্তি কৰিব পাৰিব । পূৰ্বে ধাৰ্য কৰা ৩০ শতাংশ প্ৰিমিয়ামৰ ঠাইত ১০ শতাংশ কৰা হ'ব । এইক্ষেত্ৰত কেবিনেটত চুড়ান্ত সিদ্ধান্ত হয় ।
বৈঠকৰ অন্তত মন্ত্ৰী ৰণোজ পেগুৱে সাংবাদিকক সম্বোধন কৰি এই কথা সদৰী কৰে । তেওঁ কয়,"কিছু চৰ্ত সাপেক্ষে এই ব্যৱস্থা কৰা হ'ব । মাটিৰ পট্টা লাভ কৰাজনে মাটিখিনি বিক্ৰী কৰিলে বা মাটিখিনি আমানত হিচাপে থৈ বেংকৰ পৰা ঋণ ল'লে তেওঁ বাকী ৯০ শতাংশ প্ৰিমিয়াম চৰকাৰক আদায় দিব লাগিব ।
অন্যথা তেওঁ মাটিখিনি বিক্ৰী বা মাটিখিনি আমানত হিচাপে থৈ বেংকৰ পৰা ঋণ ল'ব নোৱাৰে ।" ইপিনে কেবিনেটত ২০২৫ চনৰ ৰাজ্যিক সীমিত বন্ধৰ দিন ৩৬ দিন নিৰ্ধাৰণ কৰা হয় ।
সাতটা অতিৰিক্ত সীমিত বন্ধ এই ৩৬ টা বন্ধৰ তালিকাত অন্তৰ্ভূক্ত কৰা হৈছে । আনহাতে আলি আয়ে লৃগাং উৎসৱৰ অতিৰিক্ত সীমিত বন্ধৰ দিনটো অসমৰ ১১ খন জিলাত সীমিত বন্ধৰ দিন হিচাপে তালিকাভুক্ত কৰা হৈছে ।
কেবিনেটত কৃষি বিভাগৰ অধীনত থকা কৃষি বিপণন পৰিষদৰ চাকৰিৰ পৰা স্বেচ্ছামূলক অৱসৰ গ্ৰহণ কৰা কৰ্মচাৰীসকলৰ বাবে অসম চৰকাৰে ১১০ কোটি টকাৰ এক আঁচনিত অনুমোদন জনায় ।
লগতে মৃত্যুঞ্জয় ১০৮ সেৱাৰ উন্নতিকৰণৰ বাবে মৃত্যুঞ্জয় ১০৮ সেৱাক আদায় দিবলগীয়া ১১৫ কোটি টকা কেবিনেটে অনুমোদন জনায় । লগতে মাইক্ৰ'ফাইনেঞ্চৰ গ্ৰাহকসকলৰ ঋণ ৰেহাই দিয়াৰ বাবে চৰকাৰে ২২৩.২৬ কোটি টকাৰ অনুমোদন জনায় । কেবিনেটত হোজাই জিলাৰ সদৰ 'শংকৰদেৱ নগৰ'ৰ নাম 'শ্ৰীমন্ত শংকৰদেৱ নগৰ' হিচাপে ৰখাৰ সিদ্ধান্ত গ্ৰহণ কৰা হয় ।
| লগতে পঢ়ক: কৰিমগঞ্জ জিলাৰ নতুন নাম 'শ্ৰীভূমি জিলা' |
