পৱন সিং ঘাটোৱাৰৰ দৰে শক্তিশালী নেতা এজনক কংগ্ৰেছে অপমান কৰিলে : মুখ্যমন্ত্ৰী - CM Himanta Biswa Sarma

Assam Politics : পৱন সিং ঘাটোৱাৰৰ দৰে এজন শক্তিশালী নেতাক টিকট নিদি কংগ্ৰেছ দলে লুৰীণজ্যোতি গগৈক কিয় টিকট দিলে বুলি প্ৰশ্ন মুখ্যমন্ত্ৰীৰ ৷ কংগ্ৰেছে ডিব্ৰুগড় আসনত পৱন সিং ঘাটোৱাৰক টিকট নিদি অসমৰ চাহ শ্ৰমিকসকলক যে তেওঁলোকে গুৰুত্ব নিদিয়ে সেই বাৰ্তাটো পঠালে বুলি মন্তব্য তেওঁৰ ৷

শিৱসাগৰ, 15 জুন :জ্যেষ্ঠ কংগ্ৰেছ নেতা তথা প্ৰাক্তন কেন্দ্ৰীয় মন্ত্ৰী পৱন সিং ঘাটোৱাৰক লৈ দুখ প্ৰকাশ মুখ্যমন্ত্ৰী হিমন্ত বিশ্ব শৰ্মাৰ ৷ ডিব্ৰুগড় লোকসভা সমষ্টিত ঘাটোৱাৰক দলে টিকটৰ পৰা বঞ্চিত কৰাক লৈ কংগ্ৰেছক কটাক্ষ কৰি 'দুখ প্ৰকাশ' কৰে মুখ্যমন্ত্ৰীজনে ৷ শনিবাৰে শিৱসাগৰত নতুন ন্যায়িক ভৱন উদ্বোধন কৰি মুখ্যমন্ত্ৰী ড৹ শৰ্মাই কয়- "পৱন সিং ঘাটোৱাৰলৈ মোৰ দুখ লাগিছে ৷ পৱন সিং ঘাটোৱাৰৰ দৰে এজন শক্তিশালী নেতাক টিকট নিদি কংগ্ৰেছ দলে লুৰীণজ্যোতি গগৈক কিয় টিকট দিলে ? কামাখ্যা তাছা সাংসদ হ’ব পাৰিলে, কিন্তু পৱন সিং ঘাটোৱাৰ সাংসদো হ’ব নোৱাৰিলে ৷"

তেওঁ লগতে পৱন সিং ঘাটোৱাৰৰ দৰে চাহ শ্ৰমিকৰ এজন শক্তিশালী নেতাক কংগ্ৰেছ দলে কিয় অপমান কৰিলে সেই বিষয়ে কংগ্ৰেছ দলৰ নেতাসকলক লগ পালে সাংবাদিকসকলক সুধিবলৈ অনুৰোধ জনায় ৷ তেওঁ কয় যে, কামাখ্যা তাছা বিজেপিৰ সৰ্বভাৰতীয় ৰাষ্ট্ৰীয় সম্পাদক ৷ এই বিষয়ে হয়তো কংগ্ৰেছ দল অৱগত নহয় ৷ কামাখ্যা তাছাৰ তুলনাত পৱন সিং ঘাটোৱাৰৰ বয়স, অভিজ্ঞতাত বহুত পুৰণা ৷ গতিকে কংগ্ৰেছে ডিব্ৰুগড় আসনত পৱন সিং ঘাটোৱাৰক টিকট নিদি অসমৰ চাহ শ্ৰমিকসকলক যে তেওঁলোকে গুৰুত্ব নিদিয়ে সেই বাৰ্তাটো পঠালে বুলি তীক্ষ্ণ সমালোচনা কৰে মুখ্যমন্ত্ৰী ড৹ শৰ্মাই ৷

লগতে পঢ়ক :ডিব্ৰুগড়ৰ এলেন কেৰিয়াৰ ইন্সটিটিউটৰ অভিনন্দন অনুষ্ঠানত অংশগ্ৰহণ মুখ্যমন্ত্ৰী হিমন্ত বিশ্ব শৰ্মাৰ - Dibrugarh allen career institute

উল্লেখ্য যে, আজি শিৱসাগৰত মুখ্যমন্ত্ৰী হিমন্ত বিশ্ব শৰ্মাই জিলাখনৰ নতুন আদালত ভৱন উদ্বোধন কৰে ৷ শিৱসাগৰ নগৰৰ বিষ্ণু নগৰত নতুনকৈ নিৰ্মাণ কৰা ন্যায়িক ভৱন উদ্বোধনী অনুষ্ঠানত গুৱাহাটী উচ্চ ন্যায়ালয়ৰ মুখ্য ন্যায়াধীশ বিজয় বিষ্ণয় তথা আন বহু কেইগৰাকী ন্যায়াধীশ উপস্থিত থাকে ৷ অনুষ্ঠানত অংশ লৈ মুখ্যমন্ত্ৰী ড৹ শৰ্মাই শিৱসাগৰ জিলা সদৰত এক নতুন আদালত ভৱনৰ প্ৰয়োজনীয়তাৰ কথা উল্লেখ কৰি এই ভৱনে শিৱসাগৰবাসীৰ অভাৱ পূৰ কৰাৰ লগতে ন্যায়িক ব্যৱস্থাৰ কাম-কাজ সুচল আৰু ক্ষীপ্ৰ কৰিব বুলি আশা প্ৰকাশ কৰে ৷ ভৱন উদ্বোধনৰ অন্তত সংবাদিকৰ সৈতে হোৱা মত বিনিময়ত মুখ্যমন্ত্ৰীগৰাকীয়ে ৰাজ্যৰ পাঁচটা বিধানসভা সমষ্টিত উপ-নিৰ্বাচন আৰু পঞ্চায়ত নিৰ্বাচন আয়োগৰ সময় অনুসৰি অনুষ্ঠিত হ'ব বুলি উল্লেখ কৰে ৷ লগতে সম্পূৰ্ণ নোহোৱা ৰাষ্ট্ৰীয় ঘাইপথ চলিত বছৰৰ ভিতৰত সম্পূৰ্ণ হ'ব বুলি কয় তেওঁ ৷ আজিৰ অনুষ্ঠানত মন্ত্ৰী ডাঃ ৰণোজ পেগু, যোগেন মহনকে ধৰি চৰকাৰৰ কেবাগৰাকী উচ্চপদস্থ বিষয়া উপস্থিত থাকে ৷

লগতে পঢ়ক :লোকসভা নিৰ্বাচনৰ সময়ত দিয়া প্ৰতিশ্ৰুতি মতেই প্ৰদান কৰা হ’ব সকলো আঁচনি: মুখ্যমন্ত্ৰীৰ আশ্বাস - ASSAM GOVT SCHEMES