চিৰাং, ৪ মাৰ্চ: চিৰাং জিলাৰ থাইকাঝোৰাত আজি বীৰ চিলাগাং সোঁৱৰণী মিনি ষ্টেডিয়ামৰ আধাৰশিলা স্থাপন কৰে বিটিআৰৰ মুখ্য় কাৰ্যবাহী সদস্য় প্ৰমোদ বড়োৱে । ইয়াৰ পিচতে থাইকাঝোৰা পথাৰত অনুষ্ঠিত এখন দলীয় সভাত অংশগ্ৰহণ কৰি প্ৰমোদ বড়োৱে ইউপিপিএল দলত যোগদান কৰা ১,২৩০ গৰাকী লোকক আদৰণি জনায় । ভাষণ প্ৰসংগত তেওঁ কোকৰাঝাৰ লোকসভা সমষ্টিত ইউপিপিএলৰ প্ৰাৰ্থী অভিলেখ গঢ়ি জয়ী হোৱাটো নিশ্চিত বুলি দাবী কৰে । তেওঁ বিপিএফৰ বিৰুদ্ধে সৰৱ হৈ কয়," বিপিএফৰ মূৰব্বী হাগ্ৰামা মহিলাৰীয়ে দাবী কৰা মতে দুজন প্ৰাৰ্থীয়ে জয়ী হোৱাটো দূৰৈৰ কথা প্ৰাৰ্থীসকলে আমানতৰ ধনো ঘুৰাই নাপাব ।"
তেওঁ কয় যে বিটিআৰ চুক্তিৰ জড়িয়তে স্থায়ী শান্তি স্থাপন হৈছে আৰু লগে লগেই আৰম্ভ হৈছে উন্নয়নৰ কাম । চিৰাং জিলাৰ ভিতৰুৱা এই থাইকাঝোৰাত ৫ কোটি টকা ব্যয় সাপেক্ষে নিৰ্মাণ হ'বলগীয়া মিনি ষ্টেডিয়ামৰ আধাৰশিলাৰ ফলত এতিয়াৰে পৰা এই ভাৰত-ভূটান সীমান্তৰ ভিতৰুৱা অঞ্চলৰ ক্ৰীড়া উদ্যমী যুৱক-যুৱতীসকলে ক্ৰীড়াৰ দিশত আগবাঢ়ি যাব পাৰিব । গতিকে অন্যান্য দিশতো উন্নয়ণ তৰান্বিত কৰা হ'ব বুলি কয় বিটিআৰৰ কাৰ্যবাহী সদস্য়গৰাকীয়ে ।