ইন্টাৰনেশ্যনেল ডেস্ক, ১৮ ছেপ্টেম্বৰ: মঙলবাৰে লেবানন আৰু ছিৰিয়াত থকা সন্ত্ৰাসবাদী সংগঠন হিজবুল্লাহৰ ঘাটিসমূহক লক্ষ্য কৰি আক্ৰমণ সংঘটিত হয় । সমগ্ৰ লেবানন আৰু ছিৰিয়াৰ কিছু অংশত একেলগে প্ৰায় শতাধিক হেণ্ডহেল্ড পেজাৰ বিস্ফোৰণ ঘটি সন্ত্ৰাসবাদী সংগঠন হিজবুল্লাহৰ সদস্যসহ এগৰাকী যুৱতীকে ধৰি মুঠ আঠজন লোকৰ মৃত্যু হোৱাৰ লগতে ২৭০০ৰো অধিক লোক আহত হয় বুলি চৰকাৰী বিষয়াসকলে জনায় । লেবানন সীমান্তত ক্ৰমাৎ বৃদ্ধি পোৱা উত্তেজনাৰ পৰিপ্ৰেক্ষিতত হিজবুল্লাই এই আক্ৰমণৰ বাবে ইজৰাইলক দোষাৰোপ কৰিছে । একে সময়তে ইজৰাইল সেনাই এই বিষয়ত কোনো মন্তব্য দিবলৈ অস্বীকাৰ কৰিছে ।
সংবাদ সংস্থা এ পিৰ প্ৰতিবেদন অনুসৰি লেবাননৰ স্বাস্থ্যমন্ত্ৰীয়ে কয় যে সমগ্ৰ দেশতে পেজাৰ বিস্ফোৰণৰ ফলত ৮ জন লোকৰ মৃত্যু হোৱাৰ লগতে ২৭৫০ জন লোক আহত হৈছে আৰু ইয়াৰে ২০০ জনৰ অৱস্থা সংকটজনক । হিজবুল্লাহৰ এজন বিষয়াই দ্য এছ’চিয়েটেড প্ৰেছক জনোৱা মতে, লেবাননৰ বিভিন্ন ঠাইত হেণ্ডহেল্ড পেজাৰ বিস্ফোৰণত গোটটোৰ সদস্যকে ধৰি কেইবাশ লোক আহত হয় । তেওঁ কয় যে ছিৰিয়াত থকা হিজবুল্লাহৰ একাংশ যোদ্ধাও তেওঁলোকে কঢ়িয়াই অনা পেজাৰ বিস্ফোৰণত আহত হয় । অৱশ্যে এই আক্ৰমণত কিমান লোক নিহত হৈছে সেয়া স্পষ্ট হোৱা নাই ।
হিজবুল্লাহৰ এজন বিষয়াই এ পিক জনোৱা মতে, ইয়াৰ সদস্যসকলে ব্যৱহাৰ কৰা এটা নতুন ব্ৰেণ্ডৰ হেণ্ডহেল্ড পেজাৰ অতিমাত্ৰা গৰম হৈছিল, তাৰ পিছত বিস্ফোৰণ ঘটিছিল । এই ঘটনাত হিজবুল্লাহৰ দুজন সদস্য নিহত হোৱাৰ লগতে আন কেইবাজনো আহত হয় ।
পেজাৰ বিস্ফোৰণত ইৰাণৰ ৰাষ্ট্ৰদূত আহত:
ইৰাণৰ চৰকাৰী সংবাদ সংস্থা ইৰনাই প্ৰকাশ কৰা অনুসৰি পেজাৰ বিস্ফোৰণত ইৰাণৰ ৰাষ্ট্ৰদূত মোজতাবা আমানী সামান্যভাৱে আহত হৈ চিকিৎসালয়ত চিকিৎসাধীন হৈ আছে ।
লেবাননৰ ৰাজধানী বেইৰুটৰ দক্ষিণ উপকণ্ঠ অঞ্চলৰ পৰা ছ’চিয়েল মিডিয়া আৰু স্থানীয় সংবাদ মাধ্যমত প্ৰচাৰিত ছবি আৰু ভিডিঅ’ত দেখা গৈছে যে আহত লোকসকল ফুটপাথত পৰি আছে, তেওঁলোকৰ হাত, মুখ আৰু ভৰিত আঘাতৰ চিন স্পষ্ট । এই বৃহৎ পেজাৰ বিস্ফোৰণৰ পিছত লেবাননৰ চিকিৎসালয়সমূহৰ জৰুৰীকালীন কক্ষসমূহ ৰোগীৰে ভৰি পৰিছে । বিস্ফোৰণত বহুতো লোকে অংগক্ষত হৈছে আৰু একাংশৰ অৱস্থা সংকটজনক ।
সংবাদ মাধ্যমৰ বাতৰি অনুসৰি বেইৰুটৰ দক্ষিণ উপকণ্ঠ অঞ্চল আৰু অন্যান্য অঞ্চলত উন্নত প্ৰযুক্তি ব্যৱহাৰ কৰি হেণ্ডহেল্ড পেজাৰ বিস্ফোৰণ কৰা হয় ।