Ukrainian President on India : ভাৰত এখন বিশাল প্ৰভাৱশালী দেশ বুলি উল্লেখ কৰি জেলেনস্কিয়ে কয়, "যদি আমি এই যুদ্ধ আৰু ৰাছিয়াৰ প্ৰতি ভাৰতৰ মনোভাব সলনি কৰিব পাৰোঁ, তেন্তে আমি যুদ্ধ বন্ধ কৰিব পাৰিম । কিয়নো তেতিয়া পুটিনে ইয়াক বন্ধ কৰিব বিচাৰিব ।"
প্ৰধানমন্ত্ৰী মোদীৰ ইউক্ৰেইন ভ্ৰমণত জেলেনস্কিৰ সতে এক মুহূৰ্ত (ANI Photo)
ইন্টাৰনেশ্যনেল ডেস্ক, ২৪ আগষ্ট :ইউক্ৰেইনৰ ৰাষ্ট্ৰপতি ভলোডিমিৰ জেলেনস্কিয়ে শুকুৰবাৰে কয় যে তেওঁ ভাৰত ভ্ৰমণৰ বাবে অপেক্ষা কৰি আছে । কিয়নো ভাৰত তেওঁৰ দেশ আৰু ৰাছিয়াৰ মাজত যুদ্ধ সমাপ্ত কৰাৰ বিশ্বজনীন কূটনৈতিক প্ৰচেষ্টাত এক 'চাবি' হ'ব পাৰে ।
"ভাৰত এখন বিশাল প্ৰভাৱশালী দেশ । যদি আমি এই যুদ্ধ আৰু ৰাছিয়াৰ প্ৰতি ভাৰতৰ মনোভাব সলনি কৰিব পাৰোঁ, তেন্তে আমি যুদ্ধ বন্ধ কৰিব পাৰিম । কিয়নো তেতিয়া পুটিনে ইয়াক বন্ধ কৰিব বিচাৰিব ।" ভ্ৰমণকাৰী ভাৰতীয় সংবাদ মাধ্যমৰ সৈতে বাৰ্তালাপত এক প্ৰশ্নৰ উত্তৰত জেলেস্কিয়ে কয় ।
"এয়া আপোনালোকৰ ঐতিহাসিক পছন্দৰ বিষয়ে নহয় । কিন্তু কোনে জানে হয়তো আপোনালোকৰ দেশ এই কূটনৈতিক প্ৰভাৱৰ মূল চাবিকাঠি হ'ব পাৰে ।" তেওঁ কয়, "সেয়েহে আপোনালোকৰ চৰকাৰ, প্ৰধানমন্ত্ৰীয়ে (মোদী) যেতিয়াই মোক চাব বিচাৰে, লগে লগে মই ভাৰতলৈ আহি সুখী হ'ম ।"
আন এটা প্ৰশ্নৰ উত্তৰত তেওঁ কয়, "আমি বিচাৰোঁ যে তেওঁ (মোদীয়ে) শান্তি সন্মিলন অনুষ্ঠিত কৰক । নিশ্চিতভাৱে আমি ইয়াৰ ওপৰত কাম কৰি সুখী হ'ম । আৰু অৱশ্যে যদি তেওঁৰ কিবা ধাৰণা থাকে, তেন্তে আমি এই বিষয়ে আলোচনা কৰি সুখী হ'ম ।"
