গুৱাহাটী: 'মিছন চাইনা', 'কাঞ্চনজংঘা'ৰ পাছতে জুবিন গাৰ্গৰ কাহিনীৰে আহি আছে এখন নতুন অসমীয়া ছবি 'ৰৈ ৰৈ বিনালে' । 'ৰৈ ৰৈ বিনালে' অসমৰ প্ৰথমখন মিউজিকেল ছবি ।
ছবিখনৰ কথা বহু সময়ত জুবিন গাৰ্গে বহু ঠাইত কৈ আহিছিল যদিও অনুষ্ঠানিক ঘোষণা কৰা হোৱা নাছিল । ১৮ ছেপ্টেম্বৰত জুবিন গাৰ্গে ছবিখনৰ স্ক্ৰীপ্ট মুকলি কৰি ছবিখনৰ অনুষ্ঠানিক ঘোষণা কৰে ।
সমান্তৰালভাৱে বুধবাৰে সামাজিক মাধ্যমত এক ভিডিঅ' বাৰ্তাযোগে আহিবলগীয়া এই নতুন ছবিখনৰ কথা অৱগত কৰে শিল্পীগৰাকীয়ে । জুবিনৰ লগত উপস্থিত থাকে পৰিচালক ৰাজেশ ভূঞা, কণ্ঠশিল্পী আচুৰ্য বৰপাত্ৰ, গৰিমা শইকীয়া গাৰ্গৰ লগতে ছবিখনৰ লগত জড়িত হৈ থকা একাংশ ব্যক্তি । ভিডিঅ' বাৰ্তাযোগে জুবিন গাৰ্গে উল্লেখ কৰে,"মই নতুন ছবি এখন কৰিবলৈ লৈছো । ছবিখনৰ নাম 'ৰৈ ৰৈ বিনালে' । অসমৰ প্ৰথমখন সম্পূৰ্ণ মিউজিকেল ছবি । ছবিখনত প্ৰথমবাৰৰ বাবে আচুৰ্য বৰপাত্ৰই অভিনয় কৰিব । ছবিখনৰ পৰিচালনা কৰিব ৰাজেশ ভূঞাই । ছবিখনত নীল আকাশেও অভিনয় কৰিব ।"