হায়দৰাবাদ :চলচ্চিত্ৰ পৰিচালক সঞ্জয় লীলা ভাঞ্চালী ব্যয়বহুল চিনেমা নিৰ্মাণৰ বাবে পৰিচিত । ক্লাছিক অভিনয় আৰু কলা দুয়োটাই সঞ্জয় লীলা ভাঞ্চালীৰ ছবিত দেখিবলৈ পোৱা যায় । ভাঞ্চালীয়ে বেছিভাগ ৰোমাণ্টিক ছবিৰ ওপৰতহে গুৰুত্ব আৰোপ কৰে । ৮০ৰ দশকৰ শেষৰ ফালে তেওঁ বলীউডত প্ৰৱেশ কৰিছিল ।
১৯৯৬ চনত প্ৰথমখন ছবি পৰিচালনা কৰে সঞ্জয় লীলা ভাঞ্চালীয়ে । ইয়াৰ পিছত আৰু কেতিয়াও পিছলৈ ঘূৰি চাবলগীয়া নহ’ল তেওঁৰ । আজি ২৪ ফেব্ৰুৱাৰীত সঞ্জয় লীলা ভাঞ্চালীয়ে ৬২ সংখ্যক জন্মদিন উদযাপন কৰিছে । এই বিশেষ দিনটোত আমি তেওঁৰ পাঁচখন ছবিৰ বিষয়ে আলোচনা কৰিম যিবোৰ সকলোৱে জীৱনত এবাৰ হ’লেও চোৱা উচিত ।
হম দিল দে চুকে সনম
১৯৯৯ চনত মুক্তি পোৱা ছলমান খান আৰু ঐশ্বৰ্য ৰায় বচ্চন অভিনীত ৰোমাণ্টিক ছবি ‘হম দিল দে চুকে সনম’ৰ জৰিয়তে সঞ্জয় লীলা ভাঞ্চালীয়ে যথেষ্ট স্বীকৃতি লাভ কৰে । এই ছবিখনত প্ৰথমবাৰৰ বাবে পৰ্দাত একেলগে দেখিবলৈ পোৱা গৈছিল ছলমান আৰু ঐশ্বৰ্যক । ছবিখন ছুপাৰহিট হৈছিল আৰু আজিও ছলমানৰ অনুৰাগীয়ে এই ছবিখনক তেওঁৰ শ্ৰেষ্ঠ ছবিৰ ভিতৰত অন্যতম বুলি গণ্য কৰে । ছবিখনত এনে এটা কাহিনী উপস্থাপন কৰা হৈছে য’ত এগৰাকী ছোৱালীয়ে স্বামীৰ যত্ন লোৱাৰ উদ্দেশ্যে প্ৰেমিকৰ নিঃস্বাৰ্থ মৰমক আওকাণ কৰে ।
দেৱদাস
ছলমান খানৰ পিছত সঞ্জয় লীলা ভাঞ্চালীয়ে ২০০২ চনত শ্বাহৰুখ খানৰ সৈতে কাম কৰে । দেৱদাস ছবিখনত শ্বাহৰুখ খানক অভিনয় কৰোৱাইছিল সঞ্জয় লীলা ভাঞ্চালীয়ে । পিৰিয়ড ৰোমাণ্টিক ছবি দেৱদাস শ্বাহৰুখ খানৰ কেৰিয়াৰৰ হিট লিষ্টত অন্তৰ্ভুক্ত ৷ এই ছবিখনত শ্বাহৰুখ খানৰ অভিনয়ক আটাইতকৈ বেছি প্ৰশংসা কৰা হৈছিল । ছবিখনত ঐশ্বৰ্য ৰায় আৰু মাধুৰী দীক্ষিতেও গুৰুত্বপূৰ্ণ চৰিত্ৰত অভিনয় কৰিছিল । শ্বাহৰুখক ছবিখনত দেৱদাস মুখাৰ্জীৰ চৰিত্ৰত দেখা গৈছিল, যি নিজৰ চুবুৰীয়া পাৰ্বতী (ঐশ্বৰ্য ৰায়)ৰ প্ৰেমত পৰে, কিন্তু তেওঁলোকৰ প্ৰেমৰ মাজত বাধা আহে । বিয়া পাতিবলৈ অক্ষম হোৱাৰ পাছত দেৱদাস নিজৰ জীৱন অন্ত পেলোৱাৰ পথত আগবাঢ়ি যায় । শেষত প্ৰেমিকা পাৰোৰ ঘৰৰ সন্মুখত তেওঁৰ মৃত্যু হয় ।
ব্লেক
দেৱদাসৰ সফলতাৰ তিনি বছৰৰ পাছত সঞ্জয় লীলা ভাঞ্চালীৰ ব্লেক নাটকখনে দৰ্শকক যথেষ্ট আপ্লুত কৰিছিল । ছবিখনত অমিতাভ বচ্চন আৰু ৰাণী মুখাৰ্জীয়ে গুৰুত্বপূৰ্ণ চৰিত্ৰত অভিনয় কৰিছিল । ছবিখনত ৰাণী মুখাৰ্জীয়ে এগৰাকী ৪২ বছৰীয়া এংলো-ইণ্ডিয়ান মহিলা, যি অন্ধ, কলা আৰু মূকবধিৰ তেওঁৰ চৰিত্ৰত প্ৰশংসনীয় অভিনয় কৰিছিল । আনহাতে অমিতাভে ছবিখনত ৰাণীৰ মদ্যপায়ী শিক্ষকৰ চৰিত্ৰত অভিনয় কৰিছিল, যাৰ পিছলৈ স্মৃতিশক্তি ক্ষয় হ’বলৈ ধৰে । ‘ব্লেক’ কেৱল সঞ্জয় লীলা ভাঞ্চালীৰ নহয়, অমিতাভ বচ্চন আৰু ৰাণী মুখাৰ্জীৰ কেৰিয়াৰৰ অন্যতম শ্ৰেষ্ঠ ছবি ।
গুজাৰিশ
সঞ্জয় লীলা ভাঞ্চালীৰ কেৰিয়াৰৰ অন্যতম শ্ৰেষ্ঠ ছবি গুজৰিশ । যদি আপুনি হৃত্বিক ৰোশনৰ ক্লাছিক অভিনয় চাব বিচাৰে তেন্তে এই ছবিখন নিশ্চয়কৈ চাব । গুজাৰিশ ছবিখনৰ কাহিনী ৰচনা আৰু পৰিচালনা সঞ্জয় লীলা ভাঞ্চালীয়ে নিজেই কৰিছিল । গুৰুতৰ অসুস্থতাৰ বাবে হুইল চেয়াৰত বহি জীৱন কটাবলগীয়া হোৱা এজন প্ৰাক্তন যাদুকৰৰ চৰিত্ৰত অভিনয় কৰিছে হৃত্বিকে । ছবিখনত ঐশ্বৰ্য ৰায়ে ১২ বছৰ ধৰি হৃত্বিকৰ যত্ন লোৱা নাৰ্ছ ছ’ফিয়া ডিছুজাৰ চৰিত্ৰত অভিনয় কৰিছে ।
বাজিৰাও মস্তানী
বাজিৰাও মস্তানীৰ সৈতে সঞ্জয় লীলা ভাঞ্চালীয়ে ঐতিহাসিক যুগৰ ছবিত প্ৰৱেশ কৰে, যিখন ছবি হিট বুলি প্ৰমাণিত হয় । ২০১৫ চনত মুক্তি পোৱা বাজিৰাও মস্তানী ছবিখনত দেখা গৈছিল ৰণবীৰ সিং, দীপিকা পাডুকন আৰু প্ৰিয়ংকা চোপ্ৰাক । ছবিখনত ৰণবীৰক মাৰাঠা সাম্ৰাজ্যৰ পেশ্বৱা বাজীৰাও, পত্নী কাশীবাইৰ চৰিত্ৰত প্ৰিয়ংকা চোপ্ৰা আৰু দ্বিতীয় পত্নী মস্তানীৰ চৰিত্ৰত দীপিকাক দেখা গৈছিল । ছবিখনৰ তিনিও তাৰকাই নিজৰ কামেৰে দৰ্শকক আপ্লুত কৰিছিল । সঞ্জয় লীলা ভাঞ্চালীৰ কেৰিয়াৰৰ হিট ছবিৰ তালিকাত এই ছবিখন অন্তৰ্ভুক্ত কৰা হৈছে ।
সঞ্জয় লীলা ভাঞ্চালীৰ আহিবলগীয়া চলচ্চিত্ৰ
সঞ্জয় লীলা ভাঞ্চালীয়ে ২০২২ চনত আলিয়া ভাটৰ সৈতে গংগুবাই কঠিয়াৱাড়ী ছবিখন নিৰ্মাণ কৰিছিল, যিখন ছবি হিট বুলি প্ৰমাণিত হৈছিল । একে সময়তে সঞ্জয় লীলা ভাঞ্চালীয়ে তেওঁৰ প্ৰথমখন ৱেব-ছিৰিজ হিৰামাণ্ডী পৰিচালনা কৰিছিল, যি সমগ্ৰ দেশতে জনপ্ৰিয় হৈছিল । এতিয়া সঞ্জয় লীলা ভাঞ্চলীয়ে আলিয়া ভাট, ৰণবীৰ কাপুৰ আৰু বিকী কৌশলৰ সৈতে ‘লাভ এণ্ড ৱাৰ’ ছবিখন নিৰ্মাণ কৰি আছে, যাৰ কাহিনী তেওঁ নিজেই লিখিছে । ২০২৬ চনত মুক্তি পাব এই ছবিখন ।
লগতে পঢ়ক :একাডেমী মিউজিয়ামত ‘দেৱদাস’কে ধৰি 12খন ভাৰতীয় ছবিৰ বিশেষ প্ৰদৰ্শন
