গুৱাহাটী, 2 জুলাই :প্ৰতিটো সপ্তাহত একোখনকৈ অসমীয়া ছবিৰ মুক্তিৰ বাৰ্তাই এতিয়া উৎসাহিত কৰি তুলিছে প্ৰতিগৰাকী অসমীয়া ছবিপ্ৰেমী ৰাইজক । দীঘলীয়া হৈছে ক্ৰমে চলিত বর্ষত মুক্তি লাভ কৰা অসমীয়া ছবিৰ সংখ্যা । জুলাই মাহৰ প্ৰথমটো সপ্তাহত অৰ্থাৎ ৫ জুলাইত ছবিগৃহলৈ আহি আছে এখন নতুন অসমীয়া ছবি "ইমন" । এগৰাকী সৰু ছোৱালীৰ জীৱনৰ কাহিনীক আধাৰ হিচাপে লৈ নিৰ্মাণ কৰা এই নতুন অসমীয়া ছবিখন পৰিচালনা কৰিছে অসীম বৈশ্যই । ছবিখনৰ প্ৰযোজনা কৰিছে বিপুল চন্দ্ৰ দাস আৰু ইতি গগৈয়ে ।
শেহতীয়াকৈ মুক্তি লাভ কৰা ছবিখনৰ টিজাৰ আৰু গীতসমূহে ৰাইজৰ মাজত যথেষ্ট সঁহাৰি লাভ কৰিবলৈ সক্ষম হৈছে । ইমন ক্ৰিয়েশ্যনৰ বেনাৰত নিৰ্মাণ কৰা এই নতুন অসমীয়া ছবি "ইমন" ৰ কাহিনী আৰু পৰিচালনা অসীম বৈশ্যৰ ৷ আনহাতে চিত্ৰনাট্য-সংলাপ মৃদুল কুমাৰ বৰাৰ ৷ ছবিখনত অভিনয় কৰিছে দেৱজিত মজুমদাৰ, মহেন্দ্ৰ দাস, প্ৰতিভা চৌধুৰী, সিদ্ধাৰ্থ শৰ্মা, মুনমী ফুকন, চিমি ৰায়ান, দ্বীপজ্যোতি কেওট, ৰাজীৱ গোস্বামী, বিকি, অৰ্ণৱ আয়ান, সিদ্ধান্ত কলিতা, স্নিগ্ধা গগৈ, ববী শইকীয়া বৰা, চাজু আৰু সমীৰণ গোস্বামীয়ে । গুৱাহাটীৰ মহানগৰীৰ ভিন্ন স্থানৰ লগতে মহানগৰীৰ পাৰ্শ্বৱৰ্তী বহুকেইটা ঠাইত ছবিখনৰ দৃশ্যগ্ৰহণ কৰা হৈছে । ছবিখনৰ চিত্ৰগ্ৰহণ কৰিছে চিন্ময় ৰাভাই ।