গুৱাহাটী, ১৪ জুলাই: মূৰ্চ্ছনা মিউজিক একাডেমিৰ বাৰ্ষিক সাংস্কৃতিক অনুষ্ঠান ২০২৪ যোৱা ১২ জুলাইত গুৱাহাটীৰ শ্ৰীমন্ত শঙ্কৰদেৱ কলাক্ষেত্ৰৰ শ্ৰীশ্ৰীমাধৱদেৱ আন্তঃৰাষ্ট্ৰীয় প্ৰেক্ষাগৃহত অনুষ্ঠিত হয় । সান্তনা বেনাৰ্জী আৰু শিক্ষাকেন্দ্ৰৰ মুখ্য অধ্যক্ষ হিৰণ্য কলিতাৰ লগতে বৰ্ণালী কলিতা, জোনালী দাস আৰু পৰাগ ডেকাই বন্তি প্ৰজ্বলন কৰি নন্দ বেনাৰ্জী আৰু ভূপেন উজীৰৰ প্ৰতিচ্ছবিত শ্ৰদ্ধাঞ্জলি অৰ্পণ কৰে ৷
ৰাগিনী গোস্বামী আৰু মাইকন দেৱীয়ে আঁতধৰা অনুষ্ঠানটোত হিৰণ্য কলিতাৰ কথা-সুৰ আৰু সংগীতেৰে সজোৱা ‘লুকা-ভাকু খেলো আমি নাই আমনি’ সমবেত সংগীত পৰিৱেশন কৰা হয় । এই অনুষ্ঠানতেই অসমৰ বিশিষ্ট সংগীতজ্ঞ প্ৰয়াত নন্দ বেনাৰ্জীলৈ মূৰ্চ্ছনা মিউজিক একাডেমিয়ে মৰণোত্তৰভাৱে 'সংগীতাচাৰ্য' উপাধি তেওঁৰ পৰিয়ালৰ মুৰব্বীৰ হাতত প্ৰদান কৰে ৷ ২০২৩ বৰ্ষৰ একষ্টিক গীটাৰ পৰীক্ষাত সুখ্যাতিৰে উত্তীৰ্ণ হোৱা ধীমন্ত কুমাৰ বৰুৱাক ১১,১১১ টকাৰ চেক, শৰাই, মানপত্ৰৰে সম্বৰ্ধনা জ্ঞাপন কৰি চলিত বৰ্ষৰ সংগীত বৃত্তি ‘মূৰ্চ্ছনা মিউজিক একাডেমী’ প্ৰদান কৰা হয় ৷