মণিপুৰ :অশান্তজৰ্জ মণিপুৰত পুনৰ গুলীচালনাৰ ঘটনা ৷ সংবাদ সংস্থা ANI ৰ বাতৰিত প্ৰকাশিত তথ্য অনুসৰি, মণিপুৰৰ জিৰিবামত সোমবাৰে কেন্দ্ৰীয় সংৰক্ষিত আৰক্ষী বাহিনী আৰু অসামৰিক আৰক্ষীৰ সৈতে এক সংঘৰ্ষ হয় ৷ এই সংঘৰ্ষত দহজন উগ্ৰপন্থী নিহত হৈছে বুলি জানিব পৰা গৈছে ।
মণিপুৰ আৰক্ষীয়ে জাৰি কৰা এক প্ৰেছ বিবৃত্তি অনুসৰি, এই সংঘৰ্ষত এজন CRPF কনিষ্টবল আঘাতপ্ৰাপ্তহয় ৷ বৰ্তমান তেওঁ হাস্পতালত চিকিৎসাধীন হৈ আছে । ইতিমধ্যে এনকাউণ্টাৰৰ স্থানৰ পৰা উদ্ধাৰ হৈছে বহু অস্ত্ৰ-শস্ত্ৰ আৰু গোলাবাৰুদ ।
ইফালে এই হিংসাত্মক পৰিস্থিতিৰ পিছতে কুকি-জো পৰিষদে আজি (মঙলবাৰ) পুৱা ৫ বজাৰ পৰা সন্ধিয়া ৬ বজালৈ সম্পূৰ্ণ বন্ধ ঘোষণা কৰিছে । উচিত ন্যায় প্ৰদান কৰাৰ লগতে বিভাগীয় কৰ্তৃপক্ষক ঘটনাৰ তদন্ত কৰিবলৈ দাবী জনাইছে পৰিষদে । ইফালে পৰিস্থিতিৰ প্ৰতি লক্ষ্য ৰাখি পৰৱৰ্তী নিৰ্দেশ নোহোৱালৈকে জিৰিবামত সান্ধ্য আইন জাৰি কৰাৰ নিৰ্দেশ দিয়া হৈছে ।
"প্ৰায় ৪০-৪৫ মিনিট ধৰি হোৱা প্ৰচণ্ড গুলীয়া-গুলীৰ অন্তত পৰিস্থিতি নিয়ন্ত্ৰণলৈ অনা হয় । গুলীচালনা বন্ধ হোৱাৰ পিছত অঞ্চলটোত তালাচী চলোৱা হয় ৷ সেই ঠাইৰ পৰা অস্ত্ৰ-শস্ত্ৰৰ লগতে গুলীবাৰুদো জব্দ কৰা হয় (3 nos. of AKS, 4nos. of SLRS, 2 nos. of INSAS, 01 no. of RPG, 01 no. of Pump Action Gun, BP Helmets and Magazines) ।
মণিপুৰ আৰক্ষীয়ে দিয়া তথ্য -
উক্ত বিষয়টোৰ ওপৰত এটা অপৰাধমূলক গোচৰ ৰুজু কৰি তদন্ত অব্যাহত আছে । মণিপুৰ আৰক্ষীয়ে জনোৱা মতে, জিৰিবাম জিলাৰ বৰোবেকৰা থানাৰ অন্তৰ্গত জাকুৰাধোৰ আৰু ইয়াৰ আশে-পাশে অভিযান চলাই থকা হৈছে ৷ ইতিমধ্যে আছাম ৰাইফলছ, CRPF আৰু অসামৰিক আৰক্ষীৰে গঠিত এটা দলক ততাতৈয়াকৈ উক্ত অঞ্চলসমূহলৈ প্ৰেৰণ কৰা হৈছে ।
সংবাদ সংস্থা ANI ৰ বাতৰিত প্ৰকাশিত তথ্য অনুসৰি, এই এনকাউণ্টাৰত ১১ জন উগ্ৰপন্থী নিহত হৈছে । উত্তৰ-পূবৰ ৰাজ্যখনত যোৱা বছৰৰ ৩ মে’ত মেইটেই সম্প্ৰদায়ক অনুসূচিত জনজাতি শ্ৰেণীত অন্তৰ্ভুক্ত কৰাৰ দাবীৰ প্ৰতিবাদত সদৌ জনজাতি ছাত্ৰ সন্থাই আয়োজন কৰা এক সমাৱেশৰ সময়ত সংঘৰ্ষৰ সৃষ্টি হৈছিল । (ANI)
