নিউজ ডেস্ক, ২০ জানুৱাৰী : আগন্তুক গণৰাজ্য দিৱসৰ পৰিপ্ৰেক্ষিতত দিল্লী আন্তঃৰাষ্ট্ৰীয় বিমানবন্দৰ লিমিটেডে বিমান চলাচলত কিছু নতুন ব্যৱস্তা প্ৰৱৰ্তন কৰিছে । সেই অনুসৰি ১৯ জানুৱাৰীৰ পৰা ২৬ জানুৱাৰীলৈ পুৱা ১০.২০ বজাৰ পৰা ১২.৪৫ বজাৰ ভিতৰত দিল্লী বিমানবন্দৰৰ পৰা কোনো বিমানৰ প্ৰৱেশ বা প্ৰস্থান নহ'ব । বিমানবন্দৰ কৰ্তৃপক্ষই এক বিবৃতিত এই কথা জনাইছে ।
আনহাতে, দেশে ৭৫ সংখ্যক গণৰাজ্য দিৱস উদযাপনৰ বাবে সাজু হৈ থকাৰ সময়তে দিল্লী আৰক্ষীয়ে শুকুৰবাৰে ৰাষ্ট্ৰীয় ৰাজধানীত পেৰাগ্লাইডাৰ, পেৰামটৰ্ছ, হেং গ্লাইডাৰ, মানৱবিহীন আকাশী বাহন (ইউএভি), মানৱবিহীন বিমান ব্যৱস্থাকে (ইউএএছ) ধৰি এনে ধৰণৰ সকলো প্ৰকাৰৰ আকাশী কাৰ্যকলাপ নিষিদ্ধ কৰিছে ।
এই নিষেধাজ্ঞা 18 জানুৱাৰীৰ পৰা 15 ফেব্ৰুৱাৰীলৈ 29 দিনৰ বাবে কাৰ্যকৰী কৰা হৈছে । "খবৰ পোৱা গৈছে যে কিছু অপৰাধী বা অসামাজিক উপাদান বা সন্ত্ৰাসবাদীয়ে পেৰা-গ্লাইডাৰ, পেৰা-মটৰ, হেং গ্লাইডাৰ, মানৱবিহীন আকাশী যান (ইউএএছ), মানৱবিহীন বিমান ব্যৱস্থা (ইউএএছ), মাইক্ৰ'-লাইট এয়াৰক্ৰাফ্ট আদিৰ দ্বাৰা সাধাৰণ জনতা, গণ্যমান্য ব্যক্তি আৰু গুৰুত্বপূৰ্ণ স্থানৰ বাবে ভাবুকি সৃষ্টি কৰিব পাৰে । সৰু আকাৰৰ বিমান, কোৱাডকপ্টাৰ বা আনকি বিমানৰ পৰা পেৰা-জাম্পিং আদিৰ দ্বাৰাও এই ঘটনা সংঘটিত হ'ব পাৰে ।" দিল্লী আৰক্ষীয়ে এক বিবৃতিত কয় ।