নেশ্যনেল ডেস্ক,৫ আগষ্ট :প্ৰবল বৃষ্টিপাতৰ কবলত পৰিছে দেশৰ বিভিন্ন বিভিন্ন ৰাজ্য । বিশেষকৈ ভাৰতৰ পশ্চিম আৰু কেন্দ্ৰীয় অঞ্চলত দেওবাৰে ডাৱৰ বিস্ফোৰণ আৰু ধাৰাসাৰ বৰষুণ হোৱা দেখা গৈছে ।
ভাৰতীয় বতৰ বিজ্ঞান বিভাগে সোমবাৰে দেশৰ পূব, উত্তৰ-পূব আৰু উত্তৰ অংশত ধাৰাসাৰ বৰষুণৰ আগজাননী দিছে । আনহাতে বিহাৰ, ঝাৰখণ্ড আৰু উত্তৰ প্ৰদেশৰ বিভিন্ন স্থানত বজ্ৰপাতৰ সম্ভাৱনা আছে । কেৰালাৰ ৱায়ানাড় আৰু হিমাচল প্ৰদেশত যোৱা সপ্তাহত হোৱা ভূমিস্খলনত নিহতৰ সংখ্যা ক্ৰমান্বয়ে ২২১ আৰু ১৩ লৈ বৃদ্ধি পাইছে ।
জম্মু-কাশ্মীৰ :
জম্মু-কাশ্মীৰত ডাৱৰ বিস্ফোৰণৰ ফলত শ্ৰীনগৰ-লেহ ৰাষ্ট্ৰীয় ঘাইপথ বন্ধ হৈ পৰিছে । লাডাখৰ পৰা কাশ্মীৰ উপত্যকা বিচ্ছিন্ন হৈ পৰিছে আৰু অমৰনাথ যাত্ৰাৰ বাবে বাল্টাল আধাৰ শিবিৰ বন্ধ হৈ পৰে । ইফালে জম্মু-কাশ্মীৰত গান্দেৰবাল জিলাত ডাৱৰ বিস্ফোৰণৰ ফলত বান পৰিস্থিতি ভয়ংকৰ হৈ পৰিছে । বহু স্থানত একাংশ অট্টালিকা ক্ষতিগ্ৰস্ত হৈছে । অমৰনাথ যাত্ৰাও ব্যাহত হৈ পৰিছে ।
উত্তৰ প্ৰদেশ :
উত্তৰ প্ৰদেশত দেওবাৰে সন্ধিয়ালৈকে ২৪ ঘণ্টাত বৰষুণ সম্পৰ্কীয় ঘটনাত ৫ গৰাকী লোকৰ মৃত্যু হয় । আনহাতে ৬ খন জিলা বানৰ কবলত পৰিছে । উত্তৰ প্ৰদেশত বালিয়া, লখিমপুৰ খেৰী, ফাৰুখাবাদ, সীতাপুৰ, বিজনৌৰ আৰু বাৰাবাঁকী জিলা এতিয়াও বানৰ কবলত আছে । জলসিঞ্চন বিভাগৰ মতে বুদাউনৰ কচলা দলঙত গংগা বিপদসীমাৰ ওপৰেৰে বৈ আছে ।
উত্তৰাখণ্ড :
প্ৰচণ্ড বৰষুণৰ ফলত উত্তৰাখণ্ডৰ কেদাৰনাথলৈ যোৱা পথত বহু তীৰ্থযাত্ৰী আৱদ্ধ হৈ পৰিছে । ৪০০ ৰো অধিক লোকক স্থানান্তৰ কৰা হৈছে বুলি জানিব পৰা গৈছে । জানিব পৰা মতে এতিয়ালৈকে কেদাৰনাথ, ভীমবালি আৰু গৌৰীকুণ্ডৰ পৰা ১০,০০০ ৰো অধিক লোকক উদ্ধাৰ কৰা হৈছে ।
মহাৰাষ্ট্ৰ :
একেদৰে ধাৰাসাৰ বৰষুণ আৰু খাদকৱাছলা বান্ধৰ পৰা পানী নিষ্কাশনৰ ফলত মহাৰাষ্ট্ৰৰ পুনেৰ আৱাসিক এলেকা জলমগ্ন হৈ পৰিছে । উদ্ধাৰ অভিযানৰ বাবে সেনা জোৱানসকলক নিয়োজিত কৰা হৈছে । পুনেৰ খাদকৱাছলা, মুলচী, পাৱনা আৰু অন্যান্য বান্ধৰ পৰা পানী এৰি দিয়াৰ পৰিপ্ৰেক্ষিতত মহাৰাষ্ট্ৰৰ মুখ্যমন্ত্ৰী একনাথ সিন্দেয়ে সকলো লোকক সতৰ্ক হ'বলৈ আহ্বান জনাইছে । একেদৰে এনডিআৰএফ, এছডিআৰএফ আৰু সেনাৰ সহায়ত বিপদজনক অঞ্চলৰ পৰা লোকসকলক সুৰক্ষিত স্থানলৈ স্থানান্তৰ কৰিবলৈ নিৰ্দেশ দিছে । মহাৰাষ্ট্ৰৰ জলসিঞ্চন বিভাগৰ বিষয়াসকলে কোৱা মতে ধাৰাসাৰ বৰষুণৰ পিচত খাদকৱাছলা বান্ধৰ পৰা ৩৫,০০০ কিউছেক পানী এৰি দিয়া হৈছে । ধাৰাসাৰ বৰষুণৰ বাবে গোদাৱৰী নদীৰ জলস্তৰ বৃদ্ধি হোৱাৰ মাজতে নাছিক জিলা প্ৰশাসনে লোকসকলক সতৰ্ক হৈ থাকিবলৈ আহ্বান জনাইছে ।