নিউজ ডেস্ক, ১১ ছেপ্টেম্বৰ :লোকসভাৰ বিৰোধী দলপতি ৰাহুল গান্ধীয়ে সংৰক্ষণ সন্দৰ্ভত কৰা মন্তব্যক তীব্ৰ সমালোচনা কৰিছে কেন্দ্ৰীয় গৃহমন্ত্ৰী অমিত শ্বাহে । জ্যেষ্ঠ বিজেপি নেতা অমিত শ্বাহে বুধবাৰে কয় যে ইয়াৰ দ্বাৰা পুনৰ এবাৰ কংগ্ৰেছৰ সংৰক্ষণবিৰোধী চৰিত্ৰ সন্মুখলৈ আনিছে ।
অমিত শ্বাহে কয় যে যেতিয়ালৈকে দেশত বিজেপি আছে, কোনোৱে সংৰক্ষণ বাতিল কৰিব নোৱাৰে বা কোনোৱে দেশৰ নিৰাপত্তাৰ সৈতে হেতালি খেলিব নোৱাৰে । ৰাহুল গান্ধীয়ে আমেৰিকাৰ জৰ্জটাউন বিশ্ববিদ্যালয়ৰ ছাত্ৰ-ছাত্ৰীসকলৰ আগত কৰা মন্তব্যৰ পিছতে অমিত শ্বাহৰ এই মন্তব্য আহিছে । তাত ৰাহুল গান্ধীয়ে কৈছিল যে 'ভাৰত এক উপযুক্ত স্থান' হ'লেহে কংগ্ৰেছে সংৰক্ষণ বাতিল কৰাৰ কথা ভাবিব । কিন্তু এই মুহূৰ্তত সেইটো নহয় বুলি তেওঁ উল্লেখ কৰিছিল ।
এক্সৰ এটা পোষ্টত অমিত শ্বাহে কয়, "দেশক বিভাজন কৰাৰ ষড়যন্ত্ৰ কৰা আৰু দেশবিৰোধী মন্তব্য দিয়া শক্তিৰ সৈতে থিয় হোৱাটো ৰাহুল গান্ধী আৰু কংগ্ৰেছ দলৰ বাবে অভ্যাস হৈ পৰিছে ।"