বিশেষ প্ৰতিবেদন, 14 ছেপ্টেম্বৰ :তাজনগৰী আগ্ৰাত বৰষুণৰ তাণ্ডৱ । বিগত কিছুদিনৰ পৰা হৈ থকা ধাৰাসাৰ বৰষুণে বিপৰ্যস্ত কৰি তুলিছে জনজীৱন । কেৱল সেয়াই নহয়, ছেপ্টেম্বৰ মাহৰ অভিলেখ সৃষ্টিকাৰী বৰষুণে ক্ষতিসাধন কৰিছে কেইবাটাও ঐতিহাসিক ক্ষেত্ৰ । বিশ্ব ঐতিহ্য ক্ষেত্ৰ তাজমহলো পানীৰে উপচি পৰিছে ।
আগ্ৰাত বৰষুণৰ অভিলেখ ভংগ (ETV Bharat) বিগত ৪ দিনত তাজনগীৰত হোৱা বৰষুণৰ পৰিমাণ হৈছে 353.5 মিঃমিঃ । এইটো হৈছে এই সময়ত বৰষুণৰ এক নতুন অভিলেখ । বৰষুণৰ ফলত নদী-নলাবোৰ পানীৰে উপচি পৰিছে । ৰাজপথো পানীয়ে বুৰাই পেলাইছে । তাজমহল, আগ্ৰা ফ'ৰ্ট, বেবীতাজ, ফতেহপুৰ চিক্ৰী, ৰামবাগো বৰষুণৰ পানীৰ ফলত বেয়াকৈ ক্ষতিগ্ৰস্ত হৈছে ।
শুকুৰবাৰে ভাৰতীয় পুৰাতাত্ত্বিক জৰীপৰ এটা দল উক্ত স্থানত উপস্থিত হৈ অনুসন্ধান চলায় । বৰষুণৰ বাবে তাজমহলৰ মুখ্য সমাধিস্থলতো পানী প্ৰৱেশ কৰিছে । এ এছ আইৰ বিষয়াসকলৰ মতে, সমাধিত থকা পিতলৰ ফুলদানিৰে পানী প্ৰৱেশ কৰিছে ।
এই ফুলদানিবোৰ লগাবলৈ ব্যৱহাৰ কৰা জোৰাবোৰত মামৰে ধৰাৰ সম্ভাৱনা ব্যক্ত কৰা হৈছে । দলটোৱে জনোৱা মতে, পৃষ্ঠবোৰ শুকান হ'লে গ্ৰাউটিং আৰু পেকিং কৰা হ'ব । ইফালে যমুনাৰ বৰ্ধিত পানীৰ স্তৰে তাজমহলৰ তলৰ কুঁৱাবোৰ ভৰাই পেলাইছে ।
মঙলবাৰ, বুধবাৰ আৰু বৃহস্পতিবাৰে হোৱা ধাৰাসাৰ বৰষুণৰ ফলত তাজমহলৰ বাগিচাবোৰ বানৰ পানীৰে প্লাবিত হয় । ইয়াৰ উপৰি তিনিদিন ধৰি হৈ থকা বৰষুণৰ বাবে তাজমহলৰ মুখ্য সমাধিত অৱস্থিত শ্বাহজাহান আৰু মমতাজৰ সমাধিৰ ওপৰতো পানী পৰে ।
তাজমহলৰ চাল যদিও যথেষ্ট মজবুত গম্বুজ, কিন্তু তাৰ মাজেৰেও বহু ঠাইৰ পৰা বৰষুণৰ পানী নিগৰি আহে । একেদৰে আগ্ৰা ফ'ৰ্টৰ বিশেষ প্ৰাসাদতো পানী সোমাইছে । বেবিতাজ, ফতেহপুৰ চিক্ৰী, ৰামবাগ স্মাৰকো বৰষুণৰ পানীৰ ফলত ক্ষতিগ্ৰস্ত হৈছে । এ এছ আইৰ দলে ইয়াৰ অনুসন্ধান কৰিছে ।
- স্মাৰকসমূহৰ পৰিদৰ্শনত নিয়োজিত হৈ আছে এ এছ আই দল
এ এছ আইৰ অধীক্ষক তথা পুৰাতত্ত্ববিদ ডঃ ৰাজকুমাৰ পেটেল, তাজমহলৰ জ্যেষ্ঠ সংৰক্ষণ সহায়ক ৰাজকুমাৰ বাজপেয়ীৰ লগতে অভিযন্তাসকলৰ এটা দলে শুকুৰবাৰে তাজমহলৰ চালৰ পৰা পানী সৰকি অহা সমস্যাৰ তদন্ত কৰে । এ এছ আইৰ দলটোৱে তাজমহলৰ যিটো স্থানৰ পৰা পানী নিগৰিছিল, সেই স্থানটুকুৰা পৰ্যবেক্ষণ কৰে । পানী সৰকাৰ কাৰণ বিচাৰি উলিওৱাৰ চেষ্টা কৰা হৈছে ।
তাজমহলৰ মূল সমাধি হৈছে দ্বৈত গম্বুজ । ওপৰৰ চালত পানী নিষ্কাশনৰ বাবে এক সুন্দৰ ব্যৱস্থা আছে । অৱশ্যে নিৰন্তৰ বৰষুণৰ বাবে তলৰ চালৰ পৰা পানী সৰকিছিল । ইয়াৰ ফলত মমতাজ আৰু শ্বাহজাহানৰ কবৰত পানীৰ টোপাল পৰে ।
অৱশ্যে শুকুৰবাৰে বৰষুণ বন্ধ হোৱাৰ পিচত পানী পৰা বন্ধ হয় । শুকুৰবাৰে আগ্ৰা ফ'ৰ্টৰ জ্যেষ্ঠ সংৰক্ষণ সহায়ক কলন্দাৰ বিন্দেয়ে দলটোৰ সৈতে মুচাম্মান বৰ্জ, দিৱান-ই-আম, মতি মছজিদ, খাচ মহল আৰু অন্যান্য স্মাৰকসমূহ পৰিদৰ্শন কৰে ।
- তাজমহলৰ মূল গম্বুজটোৰে 1652 চনত প্ৰথমবাৰৰ বাবে পানী সৰকিছিল
প্ৰেমৰ প্ৰতীক তথা বিশ্বৰ সপ্ত আশ্চৰ্যৰ এটা তাজমহলৰ মুখ্য গম্বুজ লিক হোৱা আৰু তাৰ পৰা পানীৰ টোপাল নিগৰি অহাৰ বহুতো ঘটনা আছে । কিন্তু 1652 চনত মূল গম্বুজটোৰে প্ৰথমবাৰ পানী সৰকিছিল ।
মোগল সম্ৰাট শ্বাহজাহানৰ ৰাজকুমাৰ ঔৰংগজেৱে 1652 চনৰ ডিচেম্বৰত তাজমহল ভ্ৰমণ কৰাৰ পিছত শ্বাহজাহানলৈ এখন পত্ৰ লিখিছিল আৰু এই সম্পৰ্কে এক প্ৰতিবেদন দাখিল কৰিছিল । তাত কোৱা হৈছিল যে বৰষুণত উত্তৰ ফালৰ দুটা ঠাইৰ পৰা মূল সমাধিৰ গম্বুজৰ পৰা পানী সৰকে ।
ঔৰংগজেৱে তেওঁৰ প্ৰতিবেদনত লিখিছিল যে তাজমহলৰ চাৰিখন খিলানযুক্ত দুৱাৰ, দ্বিতীয় মহলাৰ গেলেৰী, চাৰিটা সৰু গম্বুজ, চাৰিখন উত্তৰ বাৰাণ্ডা আৰু সাতটা খিলানযুক্ত ভূগৰ্ভস্থ কোঠাও পানীৰে সেমেকি পৰিছিল । যোৱা বছৰো মূল গম্বুজটোৰ চাল ফুলি গৈছিল ।
অৱশ্যে ইয়াক মেৰামতি কৰা হৈছে । মছজিদ আৰু অতিথিশালাৰ গম্বুজৰ পৰা পানী ওলাইছিল আৰু সেইবোৰ জলনিৰোধকভাৱে তৈয়াৰ কৰা হয় ।
- ব্ৰিটিছকালত কেইবাবাৰো মেৰামতি কৰা হৈছিল
ব্ৰিটিছৰ সময়ছোৱাত 1872 চনত কাৰ্যবাহী অভিযন্তা জে ডব্লিউ আলেকজেণ্ডাৰৰ তত্ত্বাৱধানত তাজমহলত মেৰামতিৰ কাম কৰা হৈছিল । সেই সময়ত পানী নিগৰাৰ সমস্যাবোৰো আঁতৰ কৰা হৈছিল । ইয়াৰ পিচত 1924 চনত বাগ খান-ই-আলমৰ দেৱাল খহি পৰে ।
1924 চনৰ 7 অক্টোবৰত খহি পৰা দেৱালখন একে বছৰতে মেৰামতি কৰা হৈছিল । 1928 চনত তাজমহলৰ শ্বাহি মছজিদ লিক হোৱাৰ পিচত মেৰামতি কৰা হৈছিল । 1941 চনত মুখ্য গম্বুজটোত লিকেজ বন্ধ কৰিবলৈ কাম কৰা হৈছিল । ইয়াৰ পিচত 1978 চনৰ বানপানীত তাজৰ ভূগৰ্ভস্থ কক্ষবোৰ ক্ষতিগ্ৰস্ত হৈছিল । তাৰ পিচত তাজমহলৰ গম্বুজৰ সৈতে ভূগৰ্ভস্থ কোঠাবোৰ মেৰামতি কৰা হৈছিল ।
- চালত লগোৱা কাঠবোৰেও সঞ্জীৱনী পাইছে
তাজমহলৰ ভেটিত কুঁৱা আছে । এই কুঁৱাবোৰ শাল কাঠেৰে ভৰি আছে । শাল কাঠৰ বাবে আৰ্দ্ৰতা অতি গুৰুত্বপূৰ্ণ । বৰষুণৰ বাবে যমুনাৰ পানীৰ স্তৰ তাজমহলৰ ওচৰেৰে বৈ আছে । ইয়াৰ ফলত তাজমহলৰ ভেটিত থকা শাল কাঠে যথেষ্ট আৰ্দ্ৰতা লাভ কৰিছে । ফলত ই ভেঁটিটো শক্তিশালী কৰিছে ।
এ এছ আইৰ অধীক্ষক তথা পুৰাতত্ত্ববিদ ডঃ ৰাজ কুমাৰ পেটেলে কৈছে যে সকলো স্মৃতিস্তম্ভত ক্ষতি আৰু পানী সৰকা পৰীক্ষা কৰিবলৈ দল মোতায়েন কৰা হৈছে । সকলো স্মৃতিস্তম্ভত আৰ্দ্ৰতাৰ বাবে পানীৰ টোপাল নিগৰি যোৱাৰ খবৰ পোৱা গৈছে । অনুসন্ধানকাৰী দলে সন্দেহ কৰিছে যে তাজমহলৰ মূল সমাধিৰ ওপৰৰ পিতলৰ ভাণ্ডাৰৰ পৰা পানী আহিছে । পিতলৰ ভাণ্ডাৰ স্থাপন কৰাত লোৰ জোৰাবোৰ লগোৱা হয় । সেইবোৰত মামৰে ধৰাৰ সম্ভাৱনা আছে । মামৰৰ ফলত ধাতু ফুলি যায় । যাৰ ফলত শিলবোৰ ফাটি যোৱাৰো সম্ভাৱনা আছে ।
ইয়াৰ উপৰি এইটোও আশংকা কৰা হৈছে যে কলচিৰ ওচৰত এটা শিলৰ ফাঁট আছে । তাৰ পৰা পানী লাহে লাহে সৰকে । সেয়ে এতিয়া পৃষ্ঠ শুকান হ'লে গ্ৰাউটিং আৰু পেকিং কৰা হ'ব । এই মুহূৰ্তত মূল সমাধিক্ষেত্ৰত আৰ্দ্ৰতা আছে । এয়া শেষ হ'বলৈ সময় লাগিব । ইয়াৰ লগতে সকলো স্মাৰক নিৰীক্ষণত ৰখা হৈছে ।
কোনো স্মৃতিস্তম্ভৰ চালত পানী থাকিব নালাগিব । ইয়াৰ বাবে পানী পৰিবাহী নলাবোৰ পৰিষ্কাৰ কৰা হৈছে । স্মাৰকসমূহত পৰি যোৱা গছবোৰ কটা হৈছে আৰু আঁতৰ কৰা হৈছে । তাজমহলৰ বাগিচাত ভৰ্তি হোৱা পানী ওলাই গৈছে । বেবীতাজৰ ৰামবাগৰ ফতেহপুৰ চিক্ৰীত খহি পৰা দেৱালৰ ধ্বংসাৱশেষ আঁতৰোৱাৰ কাম কৰা হৈছে ।
আগ্ৰাত এইবাৰ ছেপ্টেম্বৰ মাহত বৰষুণৰ এক নতুন অভিলেখ সৃষ্টি হৈছে । 2021 চনৰ পিচত আগ্ৰাত এই বছৰৰ ছেপ্টেম্বৰ মাহত অতিবৃষ্টি হৈছে । এই মাহত 365.4 মিঃমিঃ বৰষুণ ৰেকৰ্ড কৰা হৈছে । আগ্ৰাত তিনি দিনত 222 মিঃমিঃ বৰষুণ হৈছে । জিলাখনত চলিত ঋতুত 1035.25 মিঃমিঃ বৰষুণ হৈছে । বতৰ বিজ্ঞান বিভাগৰ মতে, আগ্ৰাত মঙলবাৰে 13 মিঃমিঃ, বুধবাৰে 150 আৰু বৃহস্পতিবাৰে 58 মিঃমিঃ বৰষুণ ৰেকৰ্ড কৰা হৈছে ।
- কেইবা বছৰৰ মূৰত ইমান পৰিমাণৰ বৰষুণ
বছৰ অনুযায়ী চাবলৈ গ'লে, 2021 চনত 822.9 মিঃমিঃ বৰষুণ হৈছিল । একেদৰে 2022 চনত 1035.53 মিঃমিঃ, 2023 চনত 591.93 মিঃমিঃ, 2024 চনত 1035.25 মিঃমিঃ বৰষুণ হৈছিল । আনহাতে, 2021 চনত ছেপ্টেম্বৰ মাহত 96.4 মিঃমিঃ বৰষুণ হৈছিল । একেদৰে 2022 চনত 194.95 মিঃমিঃ, 2023 চনত 88.70 মিঃমিঃ, 2024 চনত 353.5 মিঃমিঃ বৰষুণ হৈছিল ।
- এইবাৰ ছেপ্টেম্বৰ মাহত হৈছে ইমান পৰিমাণৰ বৰষুণ
কৃষি বিজ্ঞান কেন্দ্ৰ বিচপুৰীৰ তথ্য অনুসৰি, 3 ছেপ্টেম্বৰত 53.0 মিঃমিঃ বৰষুণ হৈছিল । আনহাতে, 8 ছেপ্টেম্বৰত 21.0 মিঃমিঃ, 10 ছেপ্টেম্বৰত 30.75 মিঃমিঃ, 11 ছেপ্টেম্বৰত 38.75 মিঃমিঃ, 12 ছেপ্টেম্বৰত 201.00 মিঃমিঃ, 13 ছেপ্টেম্বৰত 9 মিঃমিঃ বৰষুণ হৈছিল । সকলো মিলাই এই মাহত এতিয়ালৈকে মুঠ বৰষুণ হৈছে 353.5 মিঃমিঃ ।
