নিউজ ডেস্ক, 6 মাৰ্চ:উত্তৰ প্ৰদেশৰ লক্ষ্নৌৰ কাকোৰী চহৰৰ হাটা হজৰত চাহেব ৱাৰ্ডত মঙলবাৰে নিশা ভয়াবহ অগ্নিকাণ্ডৰ ঘটনা সংঘটিত হয় ৷ এই ঘটনাত ৫ জন লোক অগ্নিদগ্ধ হৈ অকাল মৃত্যুক আঁকোৱালি লোৱাৰ লগতে আন চাৰিজন লোক গুৰুতৰভাৱে অগ্নিদগ্ধ হয় ৷ আহতসকলক উদ্ধাৰ কৰি ততাতৈয়াকৈ ট্ৰমা চেণ্টাৰলৈ প্ৰেৰণ কৰা হয় । জানিব পৰা মতে নিহতসকলৰ ভিতৰত তিনিটি শিশুও আছে ।
ইফালে অগ্নিকাণ্ডৰ তথ্য লাভ কৰাৰ পাচতেই ঘটনাস্থলীত অগ্নিনিৰ্বাপক বাহিনীৰ লগতে আৰক্ষী উপস্থিত হয় । অগ্নিনিৰ্বাপক বাহিনীৰ তিনিখন বাহনে বহু সময় ধৰি চলোৱা চেষ্টাৰ পাচত জুই নিৰ্বাপন কৰিবলৈ সক্ষম হয় । কাকোৰী আৰক্ষী থানাৰ সহকাৰী আৰক্ষী আয়ুক্ত শ্বাকিল আহমেদে জানিবলৈ দিয়া মতে, উক্ত ৱাৰ্ডটোত জাৰ্দোজিৰ শিপিনী মুছিৰ ওৰফে পুট্টু পৰিয়ালৰ সৈতে বাস কৰিছিল । অগ্নিকাণ্ডৰ সময়ত ঘৰটোত মুশ্বী (৫০), পত্নী হুছন বানো, ভাতৃ বাবলুৰ (৪৫) লগতে তেওঁৰ ভনীজোৱাই আজমদৰ দুই কন্যা উমা (০৪), হিনা (০২), ভতিজী ৰাইয়াকে (০৭) ধৰি বহু লোক উপস্থিত আছিল ।