مغربی بنگال کے شمالی 24 پرگنہ کے بھاٹ پاڑہ میونسپلٹی بی جے پی کے رکن پارلیمنٹ ارجن سنگھ کا گڑھ ہے اور اپریل میں لوک سبھا انتخابات سے قبل تک ارجن سنگھ یہاں کے چیر مین تھے۔
مگر بی جے پی میں شامل ہونے کے بعد انہوں نے استعفیٰ دے دیااور انتخاب جیتنے کے بعد ارجن سنگھ کی بدولت بی جے پی نے بھاٹ پارہ میونسپلٹی پر قبضہ کرلیا تھا۔
خیال رہے کہ لوک سبھا انتخابات کے بعد یہاں بڑے پیمانے پر فرقہ وارانہ فسادات اور بی جے پی و ترنمول حامیوں کے درمیان تشدد کے واقعات ہوئے تھے۔
آج جمعرات کو عدم اعتماد کی تحریک پر ووٹنگ ہونی تھی۔
اس موقع پر ایک بھی بی جے پی کونسلر نے حصہ نہیں لیا تھا۔عدم اعتماد کی تحریک کو بھاٹ پارہ ایگزیکٹیو آفیسر نے طلب کیا تھا۔تحریک کے دوران 35رکنی بورڈ میں 19ممبران نے عدم اعتماد کے حق میں ووٹ دیا۔
بھاٹ پارہ میونسپلٹی کے چیرمین اور بی جے پی کے رہنما سورو سنگھ ممبر پارلیمنٹ ارجن سنگھ کے بھتیجے ہیں۔
ترنمول کانگریس کے سینئر وزیر جیوتری پریہ ملک نے کہا کہ ترنمول کانگریس نے بھاٹ پارہ میونسپلٹی کے چیرمین اور بی جے پی لیڈر سورو سنگھ کے خلاف عدم اعتماد کی وتحریک پیش کیا تھا جسے 19-0سے جیت لیا گیا ہے۔
یہاں کل 35ممبران ہیں۔انہوں نے کہا کہ ہم نے آج تحریک پیش کیا تھا۔اس میں بی جے پی کونسلروں نے حصہ نہیں لیا۔
بارکپور لوک سبھا حلقے سے بی حے پی ممبر پارلیمنٹ ارجن سنگھ نے کہا کہ یہ پورا عمل غیر قانونی طریقے سے انجام دیا گیا ہے ہم اس کے خلاف قانونی کارروائی کریں گے۔
لوک سبھا انتخابات کے ترنمول کانگریس کے 26کونسلروں نے بی جے پی میں شمولیت اختیار کرلی تھی اور سورو سنگھ گزشتہ سال جون میں چیر مین بن گئے تھے۔
26کونسلروں میں 12کونسلروں کی ترنمول کانگریس میں واپسی کے بعد گزشتہ سال نومبر میں ترنمول کانگریس نے دعویٰ کیا تھا کہ انہیں اکثریت حاصل ہوگئی ہے اور جلد ہی بھاٹ پارہ میونسپلٹی کے خلاف عدم اعتماد کی تحریک لائی جائے گی۔
ارجن سنگھ نے کہا کہ چیرمین سورو سنگھ نے خود ہی 25جنوری کو تحریک اعتماد پیش کرنے کی تجویز پیش کی تھی مگر غیر قانونی طریقے سے پہلے ہی عدم اعتماد کی تحریک پیش کیا گیا ہے جس کا بی جے پی نے بائیکاٹ کیا تھا۔
بھاٹ پارہ اسمبلی حلقے سے ترنمو ل کانگریس کے چار مرتبہ کے رہے رکن اسمبلی ارجن سنگھ نے ٹکٹ نہیں ملنے سے ناراض ہوکر بی جے پی میں شامل ہوگئے تھے اور گزشتہ سال اپریل میں ہوئے پارلیمانی انتخاب میں بی جے پی کے ٹکٹ پر بارکپور لوک سبھا حلقے سے ترنمول کانگریس کے امیدوار اور سابق مرکزی وزیر دنیش ترویدی کو شکست دے کرکامیابی حاصل کی تھی۔
اس کے بعد ہی بی جے پی نے ارجن سنگھ کی طاقت کے بدولت حالی شہر، کنچا پارہ، گاڑولیا، بن گاؤ اور بھاٹ پارہ میونسپلٹی نے قبضہ کرلیا ہے۔مگر چند مہینے بعد ہی ترنمول کانگریس نے ایک ایک کرکے تمام میونسپلٹی پر قبضہ کرلیا۔
بھاٹ پاڑہ میونسپلٹی کے چیف ایگزیکٹیو آفیسر نے بتایا کہ عدم اعتماد کی تحریک کو قانون کے مطابق پیش کیا گیا ہے۔کہیں پر بھی قانون کی خلاف ورزی نہیں ہوئی ہے۔
