بنگال کے سینئر لیڈر وریاستی وزیر فرہاد حکیم نے آج دعویٰ کیا ہے کہ جلد ہی بی جے پی سے ایک ایسے سینئر لیڈر ترنمول کانگریس میں شامل ہونے والے ہیں ان کے بارے میں کوئی سوچ نہیں سکتا ہے۔
بھوانی پور ضمنی انتخاب میں ممتا بنرجی کیلئے انتخابی مہم میں قائدارانہ کردار ادا کرنے والے فرہاد حکیم آج جب انتخابی مہم میں شامل ہونے کے لیے پہنچے تب انہوں نے کہا کہ چند دنوں میں ایسے نام سامنے آئے گا جو آپ سوچ بھی نہیں سکتے ہیں۔ انہوں نے کہا کہ اور بھی کئی ممبر اسمبلی ترنمول کانگریس میں آئیں گے۔ ”میں ابھی نام نہیں کہہ رہا ہوں، لیکن انتظار کریں“۔
فرہاد حکیم کے اس بیان نے بی جے پی میں ہلچل مچا دی ہے۔ تاہم ریاستی بی جے پی فرہاد کے بیان کو عوامی سطح پر اہمیت دینے کو تیار نہیں ہے۔ بی جے پی لیڈر شیامک بھٹاچاریہ نے کہا، ''213 اراکین اسمبلی کے باوجود بھی ترنمول کانگریس کو مزید رکن اسمبلی کی ضرورت ہے۔اس سے ظاہر ہوتا ہے کہ ترنمول کانگریس کو جمہوری نظام پر کتنا اعتماد ہے۔'' بی جے پی کو اس طرح ڈرایا نہیں جا سکتا۔ بی جے پی اس سے پریشان نہیں ہے۔
بھوانی پور میں اس وقت سہ طرفہ مقابلہ ہے۔ جہاں ترنمول کانگریس کی طرف سے وزیر اعلیٰ ممتا بنرجی خود امیدوار ہیں جب کہ بی جے پی نے پرینکا تبریوال اور سی پی آئی ایم نے سریجیب بسواس کو امیدوار بنایا ہے۔
یو این آئی
