مغربی بنگال کی وزیراعلیٰ ممتابنرجی نے کہاکہ بھارتیہ جنتاپارٹی کو دہلی اسمبلی انتخابات میں شکست یقینی ہے۔ اسے مذہب کی سیاست کرنے کا پھل ملنے والا ہے۔
انہوں نے کہاکہ ملک میں مذہب کے نام پر سیاست کے لئے کوئی جگہ نہیں ہے۔ اگر ایسا کوئی کرتا ہے تو اس کا مطلب یہ ہے کہ وہ ملک میں امن وامان کے خلاف ہے ۔
وزیراعلیٰ نے کہاکہ بھارتیہ جنتاپارٹی دہلی اسمبلی انتخابات ہار چکی ہے۔ وزیراعظم نریندر مودی اور وزیرداخلہ امت شاہ کچھ بھی کہلے لیکن حقیقت یہ ہے کہ عاپ دہلی اسمبلی انتخابات جیت رہی ہے۔
انہوں نے کہاکہ بی جے پی کا غصہ بھی سامنے آنے لگا ہے ۔ بی جے پی کے رہنما انتخابی مہم کے دوران عام لوگوں کو گولی مارنے کی بات کہتے ہیں۔ کوئی شاہین باغ میں بیٹھی خواتین کو گولی مارنے کی بات کہتا ہے تو کوئی شہریت ترمیمی ایکٹ کے خلاف احتجاج کرنےوالوں کو ملک کاغدار کہتا ہے۔
انہوں نے کہاکہ بی جے پی والے ہی حب وطنی کا سرٹیفیکٹ لے کر گھوم رہے ہیں۔ بھارت کے باقی شہری غدار ہیں۔
واضح رہے کہ گزشتہ سال دسمبر میں پارلیمنٹ کے دونوں ایوانوں میں شہریت ترمیمی ایکٹ کی منظوری ملنے کے بعد مغربی بنگال کی وزیراعلیٰ ممتابنرجی نے اپنے تمام رہنما ؤں کو سی اے اے ، این آ ر سی اور این پی آر کے خلاف احتجاج جاری رکھنے کی ہدایت دی ہے ۔
ممتابنرجی کی ہدایت کے بعد ریاست کے تمام اضلاع میں شہریت ترمیمی ایکٹ کے خلاف پرُامن احتجاج کا سلسلہ جاری ہے ۔
کولکاتا کے پارک سرکس میدان میں گزشتہ 27دنوں سے شاہین باغ مظاہرے کی حمایت میں بڑی تعداد میں خواتین احتجاج کررہی ہیں۔
اسی طرح خضر پور، ناخدا مسجد اور ہوڑہ میں بھی خواتین احتجاج کررہی ہیں۔
