بھارتیہ جنتاپارٹی کے مغربی بنگال کے صدر دلیپ گھوش نے کہا کہ 'ممتا بنرجی بنگالی مخالف ہیں اور صرف ووٹ بینک کے لیے یہ سب کررہی ہیں۔
انہوں نے کہا کہ اس سے قبل ممتا بنرجی نوٹ بندی، جی ایس ٹی، تین طلاق اور کشمیرکے مسئلے پر احتجاج کرچکی ہیں جبکہ مرکز کو قانون بنانے کا مکمل حق ہے۔
انہوں نے کہا کہ ممتا بنرجی کے اقدمات غیر قانونی اور بنگالیوں کے جذبات کو مجروح کرنے والے ہیں۔ممتا بنرجی آسام جاکر بنگالیوں کے ساتھ اظہار ہمدردی نہیں کررہی ہیں جب کہ لاکھوں بنگالیوں کے خلاف آسام میں تحریک چل رہی ہے۔
انہوں نے کہا کہ بڑے پیمانے پر احتجاج ہورہے ہیں، ریلوے نظام درہم برہم ہوگیا ہے۔
دلیپ گھوش نے پورے معاملے کو لسانی عصبیت کی طرف موڑتے ہوئے کہا کہ ممتا بنرجی اردو بولنے والوں کو خوش کرنے کی کوشش کررہی ہیں اور انہیں بنگالیوں کے جذبات کی فکر نہیں ہے۔
انہوں نے کہا کہ 'شہریت ترمیمی ایکٹ کے خلاف احتجاج کی وجہ سے لاکھوں افراد متاثر ہیں لیکن ریاستی حکومت کو اس کی کوئی فکر نہیں ہے۔
واضح رہے کہ پارلیمنٹ کے دونوں ایوانوں میں شہریت ترمیمی بل پر مہر لگانے کے بعد ملک کی تمام ریاستوں کی طرح مغربی بنگال کے تمام اضلاع میں بھی شہریت ترمیمی قانون کے خلاف پرُتشدد مظاہرے جاری ہیں۔
مرکزی حکومت کے خلاف جاری پرتشدد احتجاج اب خطرناک شکل اختیار کرچکے ہے جس کی وجہ سے حالات بے قابو ہوگئے ہیں۔
