مغربی بنگال کے دارلحکومت میں واقع کلکتہ ہائی کورٹ نے اسکول سروس کمیشن کو اساتذہ کی تقرری میں گڑبڑی کے کیس میں نوٹس جاری کیا ہے۔
2016میں اسکول سروس کمیشن نے نویں۔ دسویں اور گیارہویں و بارہویں جماعت کیلئے اساتذہ کی تقرری کیلئے ٹسٹ لیا تھا۔اورل کے بعد نتائج کا اعلان کیا گیا اور کونسلنگ کے ذریعہ اساتذہ کی تقرری ہوئی۔
تاہم کئی امیدواروں نے شکایت کی کہ کم نمبر کے باوجود تقرری ہوئی اور زیادہ نمبرات والے امیدواروں کو نظرانداز کردیا گیا۔خاص کر بنگالی، انگلش، تاریخ اور سیاسیات میں یہ شکایت آئی ہے۔
امیدواروں کی پیروی کرتے ہوئے ایڈوکیٹ اشیش چودھری نے عدالت سے کہا کہ کامیاب امیدواروں کی تقرری میں شفافیت سے کام نہیں لیا گیا ہے۔قابل امیدواروں کو نظراندام کرکے سفارش اور رشوت کی بنیاد پر کم نمبرات والے امیدواروں کی تقرری کی گئی ہے۔
سماعت کے بعد جسٹس رجریش بھردواج نے اسکول سروس کمیشن کے وکیل سوتانو پوتدار کو ہدایت دی کہ کمیشن ان شکایات پر اپنا موقف 16دسمبر تک عدالت پیش کرے اور اس معاملے کی دوبارہ سماعت ہوگی۔
