کولکاتا پولیس کمشنر انوج شرما نے آج کہا ہے کہ جو بیرون ملک سے واپسی کر رہے ہیں ان سے اپیل ہے کہ وہ تمام ضوابط پر عمل کریں، ایسا نہ کرنے پر ان کے خلاف کارروائی کرتے ہوئے ان کو نظر بند کرنا پڑے گا۔
دوسری جانب وزیراعلی ممتا بنرجی نے یقین دہانی کرائی ہے کہ کورونا وائرس سے متاثر ہونے پر زیادہ خوف زدہ نہ ہوں۔ علاج کرائیں سب ٹھیک ہو جائےگا۔
واضح رہے کہ اب تک بنگال میں کورونا وائرس سے متاثر ہونے والے سب بیرون ممالک سے واپسی کرنے والے لوگ ہیں۔
بیرون ممالک سے واپسی کرنے والوں کو 14 دنوں تک کورینٹائن کی مدت پوری کرنی ہوگی ورنہ ان کے خلاف سخت کارروائی کی جائے گی۔
وزیراعلی کے انتباہ کے بعد آج کولکاتا پولیس نے بھی ٹویٹ کرکے یہ بات دہرائی ہے۔ وزیراعلی نے یہ بھی ہدایت دی ہے کہ اگر بیرون ملک سے واپس آنے والے گھر میں نظر بند نہیں ہوں گے تو انتظامیہ کو طاقت کا استعمال کرنا پڑے گا۔
کولکاتا پولیس نے اپنے ٹویٹ میں مزید لکھا ہے کہ اب تک دو لوگوں کو کورونا وائرس سے متاثر پایا گیا ہے ان کو بیرون ملک میں یہ بیماری ہوئی ہے۔
انہوں نے ضوابط کی خلاف ورزی کی جس کی وجہ سے ریاست میں خوف کا ماحول پیدا ہوا ہے لیکن اب ایسا کسی کو کرنے نہیں دیا جائے گا۔
