مغربی بنگال کے میدنی پور ضلع میں عوامی جلسے کو خطاب کرتے ہوئے مرکزی وزیر بابل سپریو نے کہا کہ خلیج بنگال میں اٹھنے والا طوفان ترنمول کانگریس کے لئے تباہ کن ثابت ہو گا۔
خلیج بنگال میں اٹھنے والے بھیانک طوفان میں ممتا بنرجی کی حکومت اور ترنمول کانگریس دونوں کا نام و نشان تک مٹ جائے گا، انہوں نے کہا کہ مغربی بنگال میں تبدیلی کی لہر پہلے ہی آچکی تھی لیکن ترنمول کانگریس کے خاتمے کے لیے خلیج بنگال میں اٹھنے والا طوفان ان کے لیے آخری ثابت ہو گا۔
انہوں نے کہا کہ سیاست میں نچلے درجے کی بیان بازی نہیں کرتا ہوں، جو بھی کہتا ہوں خوب سوچ سمجھ کر کہتا ہوں تاکہ میری باتوں سے کسی کو کوئی تکلیف نہ پہنچے میں پہلے ایک گلوکار ہوں اور اس کے بعد سیاسی رہنما اور مرکزی وزیر ہوں، میرے لیے تمام پہلوؤں پر غور کرکے بولنا ہی سب سے اہم ہے۔
ان کا کہنا تھا کہ ریاست کے لیے اہم بات یہ ہے کہ ترنمول کانگریس کی قیادت والی ریاستی حکومت کا خاتمہ طے ہے بس وقت کا انتظار ہے۔
مرکزی وزیر بابل سپریو نے کہا کہ ترنمول کانگریس کو چھوڑ کر بی جے پی میں آنے والے تمام رہنماؤں کا دل سے استقبال کرتا ہوں، ہم سب ایک خاندان کی طرح کام کرتے ہیں اور مستقبل میں بھی کریں گے، کیونکہ بنگال میں ہم حکومت بنانے کے بالکل قریب پہنچ چکے ہیں۔
