ریاست مغربی بنگال کے مختلف اضلاع میں ترنمول کانگریس کی جانب سے پٹرول اور ڈیزل کی قیمتوں میں ہورہے مسلسل اضافے کے خلاف دو روزہ احتجاجی مہم کا آغاز کیا گیا جس میں سینکڑوں حامیوں نے شرکت کی۔
ملک کی دوسری ریاستوں کی طرح مغربی بنگال کے دارالحکومت کولکاتا سمیت مختلف اضلاع میں بھی پٹرول اور ڈیزل کی قیمتوں نے سنچری مکمل کرلی ہے۔
حکمراں جماعت ترنمول کانگریس نے ایندھن کی قیمتوں میں بے تحاشہ اضافہ ہونے کے خلاف سڑکوں پر اترنے کا فیصلہ کیا۔ حکمراں جماعت ترنمول کانگریس کو اس مہم میں عام لوگوں کی بھی بھرپور حمایت حاصل ہے۔
ریاستی کابینہ وزیر جاوید احمد خان کی قیادت میں ترنمول کانگریس کے سینکڑوں حامیوں نے پٹرول اور ڈیزل کی قیمتوں کے خلاف احتجاج کیا۔ ترنمول کانگریس کے ریاستی رہنماؤں نے کہا کہ 'بی جے پی کی قیادت والی مرکزی حکومت تمام محاذ پر پوری طرح سے ناکام ہو چکی ہے۔ اس کا کسی بھی چیز پر کوئی کنٹرول نہیں ہے۔'
یہ بھی پڑھیں: پٹرول اور ڈیزل کی قیمتوں میں ایک بار پھر اضافہ
رہنماؤں نے کہا کہ 'پٹرول اور ڈیزل کی قیمتوں میں اضافہ ہونے کے سبب عام لوگوں کو پریشانیوں کا سامنا کرنا پڑ رہا ہے۔ سبزیوں کی قیمتیں آسمان چھونے لگی ہے۔ لوگوں کی آمدنی نہیں ہے لیکن انہیں ضروری اشیاء کے لئے بھاری قیمتیں چکانی پڑ رہی ہیں۔' اس دوران خواتین نے بھی پٹرول اور ڈیزل کی قیمتوں کے خلاف احتجاجی دھرنے میں بڑھ چڑھ کر حصہ لیا۔
واضح رہے کہ مغربی بنگال میں پٹرول اور ڈیزل کی قیمتوں میں اضافہ کے خلاف حکمراں جماعت ترنمول کانگریس سمیت کانگریس اور لیفٹ فرنٹ کے حامی بی جے پی کی قیادت والی مرکزی حکومت کے خلاف اختجاج کررہے ہیں۔
