ریاست مغربی بنگال میں اب اترپردیش کی طرز پر ہفتے میں دو دن لاک ڈاؤن شروع کیا گیا ہے، جبکہ یہ مہم کولکاتا پولس نے شروع کی ہے۔
کولکاتا پولس نے جمعرات اور سنیچر کو ہونے والے مکمل لاک ڈاؤن کے تئیں بیداری لانے کے لیے شہر کے متعدد علاقوں میں مہم چلائی اور شہریوں سے اپیل کی ہفتے میں دو دن ہونے والے لاک ڈاؤن میں اپنے اپنے گھروں میں رہیں اور ایمرجنسی ضرورت کے بغیر گھر سے نہ نکلیں۔
حکومت کی جانب سے جاری گائیڈ لائن کے مطابق ہر ہفتے دو دو دن لاک ڈاؤن نافذ کیا جائے گا، وہیں پہلا لاک ڈاؤن کل سے شروع ہورہا ہے، اور یہ صبح چھ بجے سے رات دس بجے تک نافذ رہے گا۔
کولکاتا پولس نے بتایا کہ بھیڑ بھاڑ اور مارکیٹ علاقے میں یہ مہم چلائی گئی ہے۔
خیال رہے کہ ریاست میں کورونا وائرس کے مریضوں کی تعداد میں اضافہ کے پیش نظر مغربی بنگال حکومت نے ماہرین کے مشورے پر ریاست بھر میں ہفتے میں دو دن لاک ڈاؤن نافذ کرنے کا فیصلہ کیا ہے۔
بنگال میں کورونا وائرس کے مریضوں کی تعداد 50 ہزار کے قریب پہنچ گئی ہے، اور اب تک 1200 افراد کی موت ہوچکی ہے۔
کولکاتا کے علاوہ شمالی 24پرگنہ، جنوبی 24پرگنہ، ہاوڑہ اور ہگلی سب سے زیادہ متاثر ہے۔
خیال رہے کہ ریاست کے کنٹیمنٹ زون میں نو جولائی سے 31 جولائی تک لاک ڈاؤن نافذ ہے، اس کے علاوہ کولکاتا پولس نے ماسک پہن کر باہر نکلنے کے لیے بھی مہم شروع کی ہے اور جگہ اس کے لیے بینر لگائے گئے ہیں۔
