'ممتا بنرجی کے ہاتھوں میں اب کچھ بھی نہیں ہے'

رکن اسمبلی مہیر گوسوامی نے کہا کہ ترنمول کانگریس کی سربراہ ممتا بنرجی کے ہاتھوں میں پارٹی سے متعلق فیصلے کرنے کے اختیارات نہیں ہیں۔

مغربی بنگال کے کوچ بہار سے رکن اسمبلی مہیر گوسوامی اور ترنمول کانگریس کے درمیان تعلقات میں دراڑیں واضح طور پر دکھائی دینے لگی ہے۔

کوچ بہار ضلع ترنمول کانگریس انتظامیہ کمیٹی سے رکن اسمبلی کے حمایتی لوگوں کے نکالے جانے کے بعد سے تنازعہ جاری ہے۔

رکن اسمبلی کا کہنا ہے کہ سچائی یہ ہے کہ ممتابنرجی کے ہاتھوں میں کچھ بھی نہیں ہے۔ ان کے اختیارات محدود کر دئیے گئے ہیں۔

انہوں نے کہا کہ یہ ایک افسوس کی بات ہے اس سے آئندہ اسمبلی انتخابات میں پارٹی کو نقصان ہو سکتا ہے۔رکن اسمبلی مہیر گوسوامی کا کہنا ہے کہ ممتابنرجی کے ساتھ گزشتہ 30 برسوں سے کام کر رہا ہوں۔ لیکن گزشتہ ایک ڈیڑھ سال سے پارٹی میں کچھ بھی ٹھیک نہیں چل رہا ہے۔

رکن اسمبلی کے مطابق برسوں سے پارٹی کے لئے کام کیا لیکن بدلتے وقت کے ساتھ سب کچھ بدل گیا۔ پارٹی میں پرانے لوگوں کی کوئی اہمیت نہیں ہے۔

انہوں نے کہا کہ مجھے کئی مواقع پر مجھے بے عزتی کا سامنا کرنا پڑا۔میرے علاوہ کئی لوگ اس برے دور سے گزر رہے ہیں۔

واضح رہے کہ کوچ بہار ضلع ترنمول کانگریس کی کمیٹی میں بڑے پیمانے پر تبدیلی کا فیصلہ کیا گیا ۔

اس فیصلے کے بعد کمیٹی سے پرانے لوگوں کی چھٹی کر دی گئی اور نئے لوگوَں کو کام کرنے کا موقع دیا گیا۔

رکن اسمبلی اس بات کو لے کر ناراض ہیں اور پارٹی کی رکنیت سے استعفی دے دیا ہے۔