بی جے پی کو وزیراعلیٰ ممتا بنرجی کی تنقید کرنے کا کوئی حق نہیں: شمس الزماں انصاری

ترنمول کانگریس کے رہنما اور رکن کونسل شمس الزماں انصاری نے کہا کہ بی جے پی کے رہنماؤں کو وزیراعلیٰ ممتا بنرجی کی تنقید کرنے کا کوئی حق نہیں ہے۔

مغربی بنگال کی حکمراں جماعت ترنمول کانگریس کے رہنما اور رکن کونسل شمس الزماں انصاری نے ای ٹی وی بھارت سے گفتگو کرتے ہوئے ریاست کی موجودہ صورتحال پر تبادلہ خیال کیا۔

ترنمول کانگریس کے رہنما کونسل شمس الزماں انصاری نے کہا کہ بی جے پی کے رہنماؤں کو وزیراعلیٰ ممتا بنرجی کی تنقید کرنے کا کوئی حق نہیں ہے۔ وزیراعلیٰ ممتا بنرجی ملک کی بہترین اور روشن خیال وزرائے اعلیٰ میں سے ایک ہیں۔

انہوں نے کہا کہ تیسری مرتبہ اقتدار میں آنے کے بعد تو وزیراعلیٰ ممتا بنرجی نے یکے بعد دیگرے ترقیاتی منصوبوں کا اعلان کرکے ثابت کر دیا کہ ترقیاتی کاموں کے لئے کوئی حد نہیں ہے۔

شمس الزماں انصاری کا کہنا ہے کہ بی جے پی کے رہنما، ترنمول کانگریس کی سربراہ اور وزیراعلیٰ ممتا بنرجی کی بلاوجہ تنقید کرتے ہیں۔ ان رہنماؤں کو اپنے اعلیٰ رہنماؤں کی طرف دیکھنا چاہیے۔

انہوں نے کہا کہ 'بی جے پی کے رہنما ممتابنرجی کو لیڈی طالبان کہتے ہیں۔ ان رہنماؤں کو بی جے پی کی حکومت والی ریاستوں میں ایک نظر ڈالنی چاہئے وہاں کیا ہوتا ہے وہ پورے ملک کو پتہ ہے۔ اُن ریاستوں میں مذہب کے نام پر سیاست، عام لوگوں میں ایک دوسرے کے خلاف نفرت پیدا کرنا اور مسلمان نوجوانوں کو ہدف بنانے والے کون ہیں، سیاسی رہنما یا پھر طالبانی، وہ سب کو پتہ ہے'۔