سیلاب متاثرہ اضلاع میں حالات کافی بہتر ہیں: فیروزہ بی بی

ترنمول کانگریس کی سینئیر رہنما اور رکن اسمبلی فیروزہ بی بی نے کہا کہ سیلاب زدہ علاقہ مشرقی مدنی پور میں ندی اور بارش کا جمع پانی نکل چکا ہے اور اب لوگ بھی آہستہ آہستہ اپنے گھروں کو واپس جارہے ہیں۔

ترنمول کانگریس کی سینیئر رہنما فیروزہ بی بی نے کہا کہ مشرقی مدنی پور، مغربی مدنی پور، بردوان اور ہوڑہ میں سیلابی صورتحال کا خطرہ پوری طرح سے ٹل گیا ہے۔ حالات میں تیزی سے بہتری آئی ہے اور امید کرتے ہیں کہ چند دنوں میں مشرقی مدنی پور ضلع میں سب کچھ پہلے کی طرح ہوجائے گا۔

ترنمول کانگریس کی رہنما کا کہنا ہے کہ سیلابی صورتحال پیدا ہونے کے بعد جو لوگ کیمپوں میں پناہ لئے ہوئے تھے، وہ آہستہ آہستہ اپنے اپنے گھروں کو واپس جارہے ہیں۔ راحت کیمپوں میں اب بھی کئی کنبے موجود ہیں. کیمپوں میں پناہ لینے والے لوگوں کو تمام تر سہولیات فراہم کرنے کی ہر ممکن کوشش کی جارہی ہے.

سیلاب متاثرہ اضلاع میں حالات کافی بہتر ہیں

انہوں نے کہا کہ مشرقی مدنی پور ضلع کے بشیر علاقوں میں ندی اور بارش کا جمع پانی نکل چکا ہے۔ منہدم گھروں کی دوبارہ تعمیر کرنے کا کام جاری ہے۔

واضح رہے کہ مغربی بنگال کے بردوان ضلع کے درگاپور بیراج سے روزانہ سینکڑوں کیوزک پانی چھوڑنے کا سلسلہ جاری ہے۔ اس درمیان ندی میں پانی کی سطح میں اضافہ ہوا ہے۔ اس کے سبب بردوان، مشرقی مدنی پور اور ہوڑہ ضلع کے بیشتر علاقوں میں سیلابی صورتحال انتہائی خراب ہوچکی ہے۔ اس دوران اب تک متعدد افراد کی موت ہوگئی ہے۔

اس دوران ہگلی ندی میں پانی کی سطح میں تشویشناک طور پر اضافہ ہونے کی وجہ سے ہوڑہ ضلع میں سیلاب جیسی صورتحال بن گئی تھی۔