مغربی بنگال کے ضلع ہوڑہ کے ڈومجورلا اسٹیڈیم میں عوامی جلسے کو خطاب کرتے ہوئے شھبندو ادھیکاری نے کہا کہ ترنمول کانگریس کا زوال شروع ہو چکا ہے۔
انہوں نے کہا کہ راجیب بنرجی کا پارٹی چھوڑ کر بی جے پی میں شامل ہونا ہی اس بات کا ثبوت ہے کہ ترنمول کانگریس بکھر چکی ہے۔
بی جے پی کے رہنما کا کہنا ہے کہ ترنمول کانگریس کے تمام ایماندار رہنما ایک ایک کرکے پارٹی کو چھوڑ کر بی جے پی میں شامل ہونے کو ترجیح دے رہے ہیں۔ آخر اس کی کیا وجہ ہے۔
شھبندو ادھیکاری نے کہا کہ 28 فروری کو ترنمول کانگریس سیاسی جماعت کم نجی کمپنی بن کر رہ جائے گی۔ انہوں نے کہا کہ فروری مہینے کے آخر تک ترنمول کانگریس میں ممتا بنرجی اور ان کے بھتیجے ابھیشیک بنرجی ہی رہ جائیں گے اور باقی انہیں چھوڑ کر چلے جائیں گے۔
ترنمول کانگریس کو چھوڑ کر بی جے پی میں شامل ہونے والے راجیب بنرجی نے کہا کہ مغربی بنگال کے عوام ایک بار پھر تبدیلی کے گواہ بنیں گے۔
انہوں نے کہا کہ آج سے گیارہ برس قبل تبدیلی کی لہر میں لیفٹ فرنٹ کی حکومت اکھڑ گئی اور اس مرتبہ ترنمول کانگریس کا خاتمہ ہو جائے گا۔
مزید پڑھیے: ترنمول اور بی جے پی کے حامیوں کے درمیان تصادم، درجنوں زخمی
بی جے پی کے جلسے میں پہلی مرتبہ شامل ہونے والے راجیب بنرجی کا کہنا ہے کہ مغربی بنگال میں بی جے پی سب سے بڑی پارٹی بن کر ابھرے گی۔
ہوڑہ کے ڈومجورلا اسٹیڈیم میں منعقد بی جے پی کے جوگ دان ریلی میں ترنمول کانگریس کو چھوڑ کر بی جے پی میں شامل ہونے والے سابق رکن اسمبلی پرابیر گھوشال، ویشالی ڈالمیا اور اداکار ردرانیل گھوش موجود تھے۔
