ریاست مغربی بنگال کے کٹوا کے منتشور تھانہ علاقے میں ایک ہی خاندان کے تین افراد کی پراسرار موت کا دلدوز واقعہ پیش آیا ہے۔
منتشور علاقے میں واقع ایک مکان میں تینوں افراد کی لاش جھلسی ہوئی حالت میں پائی گئی ہے۔ ہلاک ہونے والوں میں سدیو چند دے، ان کی بیوی ریکھا دے اور بیٹا سنگھا دے شامل ہیں۔ پولیس نے جائے وقوع پر پہنچ کر تفتیش شروع کر دی ہے۔
پولیس کا کہنا ہے کہ سدیو چند دے ریلوے میں ملازمت کرتے ہیں۔ پولیس نے مزید کہا کہ تفتیش جاری ہے لیکن اب تک ٹھوس جانکاری نہیں مل سکی ہے۔
یہ بھی پڑھیں: ' شھبندو ادھکاری کے بارے میں وزیراعلی جانتی ہیں'
رشتہ داروں سے پوچھ تاچھ کی جا رہی ہے۔ ان کا مزید کہنا ہے کہ مالی حالت بہتر تھی تو اچانک ایسا کیا ہوگیا کہ تینوں کی لاش ایک ہی کمرے سے ملی۔
رشتہ داروں کا کہنا ہے کہ سدیو چند کل اپنی فیملی کے ساتھ پیکنک منانے گئے تھے۔ رات کو گھر آئے، سبھی نے مل کر ساتھ کھانا کھایا اور وہ اپنی فیملی کے ساتھ اپنے کمرے میں سونے کے لیے چلے گئے۔
اس واقعے کے بعد علاقے میں غم کا ماحول ہے۔ پڑوسیوں کو یقین نہیں ہو رہا ہے کہ ایک ہی دن میں سب کچھ کیسے ختم ہوگیا۔
