مغربی بنگال میں عام انتخابات میں بی جے پی کی غیر متوقع کامیابی کے بعد حکمراں جماعت ترنمول کانگریس کی سربراہ ممتابنرجی نے عوام کوپارٹی سے جوڑنے کے لیے دیدی کو بولو مہم کی شروعات کی تھی ۔
اس کے مقابلے میں ریاستی سی پی آئی ایم ایک ویب سایٹ کا افتتاح کیا جس کانام دیدی جواب دو ہے۔ ریاست بھر میں سی پی آئی ایم دیدی کو بولو پروگرام کے خلاف مہم چلارہی ہے ۔
ضلع سلی گوڑی میونسپل کارپوریشن کے میئر اشوک بھٹاچاریہ نے اسی مہم کو آگے بڑھاتے ہوئے میئر کو بولومہم کا افتتاح کیا۔ میئر کو بولو مہم کے ذریعہ لوگوں کو سی پی ایم سے جوڑنے کی کوشش کی جائے گی۔
انہوں نے کہاکہ مغربی بنگال میں تبدیلی لہر کے باوجود سلی گوڑی کے لوگوں نے بائیں محاذ پر بھروسہ رکھا اور ہمیں میونسپل کارپوریشن میں بورڈ بنانے کا موقع دیا۔
سلی گوڑی میونسپل کارپوریشن کے میئر اشوک بھٹاچاریہ نے پر یس کانفرنس کے دوران کہاکہ ریاستی سی پی ایم کے طرز پر میئر کوبولو مہم کا آغاز کیا گیا ہے۔
میئر کے مطابق اس مہم کے تحت سلی گوڑی اور اس کے اطراف میں لوگوں کو سی پی ایم سے جوڑنے کی کوشش کی جائے گی۔ اس مہم کے تحت لوگوں کو سلی گوڑی میں ترقیاتی کاموں اور مستقبل کے منصوبوں سے واقف کرانے کی کوشش کی جائے گی۔
انہوں نے کہاکہ ایک اچھی پہل ہے۔اس سے لوگوں کے خیال سے واقف ہونے کاموقع ملے گا۔زیادہ سے زیادہ تعداد میں لوگوں کی توجہ اپنی جانب مبذول کرانے میں کامیا ب ہوں گے ۔
سلی گوڑی کے میئر نے کہاکہ تمام کونسلروں کو اس مہم میں بڑھ چڑھ کر حصہ لینے کی ہدایت دی گئی ہے۔ انہیں اپنے طور پر لوگوں کو اس مہم سے واقف کرانے کی ہدایت دی گئی ہے۔ہم مقصد کو کامیاب بنانے کے لیے اس مہم کی کامیابی کی دعاکرتے ہیں۔
واضح رہے کہ ضلع سلی گوڑی مغربی بنگال کاواحد ضلع ہے جوترنمول کانگریس کے لیے دردسر بنا ہو اہے ۔سلی گوڑی کے رکن پارلیمان بی جے پی سے تعلق رکھتے ہیں۔ رکن اسمبلی بھی بی جے پی سے ہیں۔ سلی گوڑی میونسپل کارپوریشن ، ضلع پرشید اور پنچایت پربھی سی پی ایم کا قبضہ ہے۔
