بھارتیہ کسان یونین کے رہنما راکیش ٹکیت آج مغربی بنگال کی وزیر اعلیٰ ممتا بنرجی سے ملاقات کریں گے۔ خبروں کے مطابق ٹکیت کسانوں کی تحریک سے متعلق امور کے سلسلے میں کولکتہ میں ممتا بنرجی سے ملاقات کرنے جارہے ہیں۔
اس سلسلہ میں راکیش ٹکیت نے کہا، 'میں آج (شام کے قریب 3 بجے) ان (ممتا بنرجی) سے ملوں گا۔ ہم زراعت، صحت، تعلیم اور مقامی کسانوں کے بارے میں بات کریں گے۔ واضح رہے کہ ٹکیت نے بنگال انتخابات میں ممتا بنرجی کے لئے انتخابی مہم چلائی تھی۔
یہ یاد رہے کہ بھارتیہ کسان یونین دہلی کی سرحدوں پر گزشتہ سال 26 نومبر سے مرکز کے تین زرعی قوانین کے خلاف احتجاج کررہی ہے ۔بھارتیہ کسان یونین (بی کے یو) کے رہنما راکیش ٹکیت نے 29 اپریل کو کہا تھا کہ جب بھی حکومت چاہے، کاشتکار تنظیمیں مرکز کے ساتھ تین متنازعہ زرعی قوانین پر تبادلہ خیال کرنے کے لئے تیار ہیں۔ لیکن انہوں نے اصرار کیا کہ بحث قانون کے خاتمے کے بارے میں ہونی چاہئے۔
