مغربی بنگال کے محکمہ صحت نے کورونا وائرس پر قابو پانے کے لئے کئی اقدامات کرتے ہوئے اسپتال آنے والے مریضوں کے ساتھ رشتہ داروں کے لئے بھی ماسک پہننا لازمی قرار دیا ہے۔
محکمہ صحت کی جانب سے جاری نوٹس میں کہا گیا ہے کہ ماسک نہیں پہن کر آنے والوں کو اسپتال میں داخل نہیں ہونے دیا جائے گا۔ ریاستی حکومت نے گزشتہ دنوں نوٹس جاری کرتے ہوئے کہا تھا کہ باہر نکلنے کی صورت میں ہر ایک شخص کو ماسک پہننا لازمی ہوگا۔
نوٹس میں کہا گیا ہے کہ کووڈ۔19 میں مبتلا مریضوں کے اہل خانہ کو اسپتال کے آئسولیشن وارڈ میں داخل نہیں ہونے دیا جائے گا۔ اسپتال کے ایمرجنسی ڈیپارٹمنٹ میں داخل ہونے کے لئے مریض اور ان کے رشتہ دار کو حفاظتی سامان پہننے ہوں گے۔اس کے علاوہ تمام افراد کا تھرمل معائنہ کیا جائے گا۔
نوٹس میں کہا گیا ہے کہ بخار میں مبتلا کسی بھی فرد کو ایمرجنسی ڈیپارٹمنٹ میں داخل نہیں کیا جائے گا اور اسے 'بخار کلینک' جانے کا مشورہ دیا جائے گا۔ اس وقت کوویڈ 19 کے علاج کے لئے مغربی بنگال میں 64 اسپتال ہیں اور ہندوستانی میڈیکل ریسرچ کونسل کے ذریعہ تصدیق شدہ سات جانچ مراکزکام کررہے ہیں۔
