مرکزی حکومت کے ذریعہ جموں و کشمیر سے آرٹیکل 370 اور 35 اے کو ہٹائے جانے پر مغربی بنگال کے دارلحکومت کولکاتا اور مختلف اضلاع میں جشن منانے کے دوران سینکڑوں بی جے پی کے کارکنان کی گرفتاری عمل میں آ ئی۔
مغر بی بنگال کے کولکاتا اور اس کے اطراف میں مرکزی حکومت کی جانب سے جموں و کشمیر سے آرٹیکل 370 اور 35 اے کو ہٹائے جانے پر ریاستی بی جے پی کی جانب سے جشن منانے کی کوشش کی گئی۔
مرکزی حکومت کے فیصلے کے بعد مرکزی کولکاتااور اس کے اطراف سالٹ لیک، بیرکپور اور ہوڑہ میں بی جے پی کے حامیوں نے سڑک پر اتر کر نعرہ بازی اور جشن منانے کی کوشش کی۔
کولکاتا پولیس اور مغربی بنگال کی پولیس نے سخت کارروا ئی کرتے ہوئے بی جے پی کے حامیوں کو لاء اینڈ آرڈر بگڑنے کے الزام میں گرفتار کرلیا۔
موصولہ اطلاع کے مطابق ضلع بردوان کے آسنسول، پانا گڑھ، سلی گوڑی،جلپائی گوڑی، مدنی پور کے علاوہ مختلف اضلاع سے بی جے پی کے کارکنان کی گرفتاری عمل میں آ ئی ہے۔
