مغربی بنگال میں کورونا کے معاملوں میں تیزی سے اضافہ ہو رہا ہے۔ اس کے پیش نظر ریاستی حکومت نے ریاست میں مکمل طور پر لاک ڈاؤن نافذ کردیا ہے جس سے عام زندگی مفلوج ہوکر رہ گئی ہے۔
مکمل لاک ڈاؤن سے جہاں عام لوگوں کو شدید دشواریوں کا سامنا کرنا پڑ رہا ہے۔ وہیں غریبوں اور مسکینوں کے لیے دو وقت کی روٹی مہیا کرپانا مشکل ہو گیا ہے۔
کورونا گائڈ لائن کے تحت مساجد میں نمازیوں کے داخلے کو بھی محدود کردیا گیا ہے جس سے مسجد کے باہر مانگنے والے غریبوں اور مسکینوں کی پریشانیوں میں مزید اضافہ ہوگیا ہے۔
اس دوران ای ٹی وی بھارت نے مسجد کے دروازے پر مانگنے والے فقیروں کے تعلق سے سماجی کارکنان محمد الیاس سے بات کی۔
اس تعلق سے محمد الیاس نے بتایا کہ لاک ڈاؤن کی وجہ سے مقامی لوگوں کا مسجد میں آنا جانا بند ہے جس کی وجہ سے فقیروں کو شدید مشکلات کا سامنا کرنا پڑ رہا ہے۔ اس دوران کوئی کچھ دے کر چلا جاتا ہے، اس سے ہی ان کی زندگی بسر ہو رہی ہے۔
واضح رہے کہ لاک ڈاؤن کے سبب غریب مسکینوں کو کئی پریشانیوں کا سامنا کرنا پڑ رہا ہے اور مسجد میں نمازیوں کے نہیں آپانے سے ایسے مانگنے والے افراد بھوکا رہنے پر مجبور ہو گئے ہیں۔
