بھوانی پور اسمبلی حلقہ کے ووٹروں کو ممتا کی جیت کا یقین

آج ترنمول کانگریس کی سربراہ ممتا بنرجی کے اسمبلی حلقہ میں ضمنی انتخاب ہوئے۔ ممتا بنرجی خود بھی اسی اسمبلی حلقہ کی ووٹرس ہیں آج شہ پہر وہ اپنا ووٹ ڈالنے مترا انسٹی ٹیوٹ پہنچی ووٹ ڈالنے جب آئی تو ان کے چہرے پر صاف طور پر فاتحانہ مسکراہٹ دیکھی جا سکتی تھی۔

مغربی بنگال کے تین سیٹوں پر ضمنی انتخاب میں ممتا بنرجی کے اسمبلی حلقہ بھوانی پور میں صبح سے ووٹ ڈالنے والوں کی بھیڑ دیکھی گئی، وہیں دوسری جانب کولکاتا میں صبح سے ہی وقفے وقفے میں بارش بھی ہوئی۔ ممتا بنرجی نے مترا انسٹی ٹیوٹ میں شہ پہر میں ووٹ ڈالا اس سے قبل ابھیشیک بنرجی نے بھی ووٹ دیا۔ بھوانی پور اسمبلی حلقہ میں ووٹنگ کے دوران کہیں ترنمول کانگریس اور بی جےپی کے حامیوں میں معمولی بحث و تکرار بھی ہوئی جبکہ بی جے پی کی امیدوار نے جعلی ووٹ ڈالنے کا الزام بھی لگایا ہے۔

آج کا انتخاب وزیر اعلی ممتا بنرجی کے لیے بہت اہم ہے۔ ساڑھے تین بجے وہ مترا انسٹی ٹیوٹ پہنچی اور چھ منٹ کے درمیان اپنا ووٹ ڈال کر باہر آگئیں۔ ووٹ دینے کے بعد اپنے گھر پہنچ کر اپنی یقینی جیت کا نشان دکھایا۔ 2021 اسمبلی انتخابات میں وہ جیت کر بھی ہار گئیں تھیں۔ وہیں دوسری جانب کولکاتا کے مختلف علاقوں میں آج صبح سے وقفے وقفے میں بارش ہوتی رہی اس کے باوجود بھی لوگ ووٹ ڈالنے اپنے گھروں سے نکلے اور پولنگ مراکز میں ووٹروں کی اچھی خاصی بھیڑ نظر آئی۔

ای ٹی وی بھارت سے بات کرتے ہوئے ووٹروں نے بتایا کہ وہ موجودہ حکومت کے کام سے خوش ہیں۔ ان کا کہنا تھاکہ ممتا بنرجی کی حکومت بہت اچھے سے کام کر رہی ہے۔ ہم چاہتے ہیں کہ ان کی ہی جیت ہو کیونکہ ہم ترقی چاہتے ہیں ایک اچھا رہنما چاہتے ہیں۔'