ترنمول کانگریس کی سربراہ اور مغربی بنگال کی وزیر اعلی ممتا بنرجی جو گذشتہ کل نندی گرام میں انتخابی مہم کے دوران ایک مبینہ حملے کے دوران زخمی ہو گئیں تھی، جس کے بعد ان کو علاج کے لئے کولکاتا کے ایس ایس کے ایم ہسپتال میں داخل کیا گیا ہے۔ ممتا بنرجی فی الحال ایس ایس کے ایم ہسپتال کے ووڈ برن بلاک میں زیر علاج ہیں۔
انہوں نے آج ایک ویڈیو پیغام جاری کرتے ہوئے اپنے حامیوں اور عام لوگ سے پر امن رہنے کی اپیل کی ہے۔ ساتھ ہی انہوں نے خود پر ہوئے حملے کو درست بتایا ہے۔
ویڈیو پیغام میں ممتا بنرجی نے کہا ہے کہ ان کے ہاتھ اور پاؤں میں شدید چوٹ آئی ہے۔ میرے پاؤں کی ہڈی میں چوٹ ہے۔ میرے سر اور سینے میں بھی درد ہے۔ انہوں نے بتایا کہ جب وہ اپنی گاڑی کی بونیٹ پر چڑھ کر لوگوں کو نمسکار کر رہی تھی اسی دوران یہ واقعہ پیش آیا۔
انہوں نے کہا کہ میں اپنے تمام چاہنے والوں سے اپیل کرتی ہوں کے وہ پر امن رہیں۔ ایسا کوئی کام نہ کریں جس سے عام لوگوں کو کوئی پریشانی ہو۔ دو تین دن میں میری ہسپتال سے چھٹی ہو جائے گی لیکن میں اس حالت میں بھی انتخابی مہم جاری رکھوں گی۔ ضرورت پڑی تو وہیل چئیر پر بیٹھ کر انتخابی مہم میں شرکت کروں گی تمام میٹنگ میں جاؤں گی اور اسی لئے مجھے آپ تمام لوگوں کی مدد کی ضرورت ہے۔'
