ریاست مغربی بنگال میں جاریہ سال منعقد ہونے والے اسمبلی انتخابات کی تاریخیں جوں جوں قریب آرہی ہیں توں توں سیاسی سرگرمیوں میں زبردست تیزی آگئی ہے۔ ایک جانب بی جے پی اپنے اعلیٰ رہنماؤں کی مدد سے مغربی بنگال میں روزانہ جلسے و جلوس کے ذریعہ عوام کی توجہ اپنی جانب مبذول کرانے کی ہر ممکن کوششوں میں مصروف ہے تو دوسری جانب لیفٹ فرنٹ اور کانگریس اتحاد اپنی کھوئی ہوئی ساکھ واپس حاصل کرنے کے لئے کمر کس کر انتخابی میدان میں اتر چکی ہے۔
پارٹی بدلنے کے کھیل میں ابتدائی نقصان کا سامنا کرنے کے بعد ترنمول کانگریس بھی اپنی پوری طاقت کے ساتھ اپوزیشن جماعتوں پر ٹوٹ پڑی ہے۔ نندی گرام کے بعد وزیراعلیٰ ممتا بنرجی پرولیا ضلع کے ہگٹم باڑی فٹبال میدان میں عوامی جلسے کو خطاب کریں گی۔ ذرائع کے مطابق وزیراعلیٰ ممتا بنرجی عوامی جلسے کو خطاب کرتے ہوئے جنگل محل کے لوگوں کے لئے متعدد ترقیاتی منصوبوں کا اعلان کر سکتی ہیں۔ ضلع پولیس سپرنٹنڈنٹ نے فٹبال میدان کا دورہ کرکے وزیراعلیٰ ممتا بنرجی کی سکیورٹی انتظامات کا جائزہ لیا۔ انہوں نے کہا کہ سکیورٹی انتظامات تشفی بخش ہیں۔ اضافی پولیس اہلکاروں کو بھی تعینات کرنے کا فیصلہ کیا گیا ہے۔
واضح رہے کہ ترنمول کانگریس کی سربراہ اور وزیراعلیٰ ممتا بنرجی ان دنوں شمالی بنگال کے دورے پر ہیں۔ گزشتہ روز نندی گرام میں ترنمول کانگریس کی سربراہ ممتا بنرجی نے عوامی جلسے کو خطاب کیا تھا۔
