ترنمول کانگریس کی رہنما اور رکن پارلیمان مہوآ موئترا نے دہلی پولیس کو خط لکھ کر مطالبہ کیا ہے کہ بلا مطالبہ لگائے گئے بی ایس ایف کے جوانوں کو ان کے گھر کے باہر سے واپس بلا یا جائے۔
مغربی بنگال کے کرشنا نگر حلقے سے رکن پارلیمان مہوا نے دہلی کے پولیس کمشنر ایس این شریواستو اور کناٹ پلیس ایس ایچ او کو اس سلسلے میں آج ایک خط لکھا ہے۔
خط کے مطابق انہوں نے کبھی اس طرح کی سکیورٹی نہیں مانگی ہے۔ انہوں نے الزام عائد کیا کہ ان کے گھر کے باہر بی ایس ایف کی تعیناتی کر کے ان کی جاسوسی کروائی جا رہی ہے۔ انہوں نے مطالبہ کیا کہ ان اہلکاروں کو ہٹایا جائے۔
انہوں نے کہا کہ بارہ کھمبا روڈ تھانے کے ایس ایچ او جمعہ کی شام تقریباً ساڑھے چھ بجے ان کی رہائش گاہ پر ملاقات کے لیے آئے۔ اس کے بعد تقریباً 10 بجے رات بی ایس ایف کے تین اہلکاروں کو گھر کے باہر تعینات کر دیا گیا۔ ان سلامتی اہلکاروں کے برتاؤ سے لگا کہ وہ موومنٹ نوٹ کر رہے ہیں۔
انہوں نے مزید کہا کہ مجھے محسوس ہوا کہ میں کسی طرح کی نگرانی میں ہوں۔ پرائیویسی کا حق بنیادی حق ہے۔ تین ہتھیار بند پولیس اہلکار میرے گھر کے باہر تعینات ہیں جبکہ میں نے سکیورٹی نہیں مانگی ہے، انہیں ہٹایا جائے۔
