مغربی بنگال کے درالحکومت کولکاتا سمیت مختلف اضلاع میں تیز ہواؤں کے ساتھ موسلادھار بارش کا سلسلہ جاری ہے۔
علی پور محکمہ موسمیات کے مطابق مختلف اضلاع میں تیز ہواؤں کے ساتھ موسلادھار بارش کا سلسلہ آئندہ چند دنوں تک جاری رہے گا۔
مغربی بنگال کے مختلف اضلاع میں تیز ہواؤں کے ساتھ بارش کے دوران آسمانی بجلی گرنے سے 23 لوگوں کی موت ہو گئی۔ وزیراعظم نریندر مودی نے اس واقعے پر افسوس کا اظہار کیا ہے۔
ذرائع کے مطابق موسلادھار بارش کے دوران آسمانی بجلی گرنے سے ہگلی ضلع میں 11 افراد مرشدآباد ضلع کے رگھوناتھ پور میں نو افراد اور ندیا ضلع میں ایک شخص کی موت ہوئی ہے۔
آسمانی بجلی کی زد میں آکر ہلاک ہونے والوں میں زیادہ تر لوگ کسان تھے جو بارش کے وقت کھیت میں کام کر رہے تھے۔
واضح رہے کہ گزشتہ روز اتوار کو درگاپور میں آسمانی بجلی گرنے کا واقعہ پیش آیا تھا۔ اس واقعے میں چار لوگوں کی موت ہوئی ہے جبکہ ایک شدید طور جھلس گیا ہے۔
وزیراعظم نریندر مودی نے آسمانی بجلی کی زد میں آکر ہلاک ہونے والوں کے اہل خانوں سے ہمدردی کا اظہار کیا ہے۔
وزیراعظم نریندر مودی نے اپنے ٹویٹ میں لکھا کہ مغربی بنگال میں آسمانی بجلی کی زد میں آکر ہلاک ہونے والوں کی خبر تکلیف دہ ہے۔ان کے ساتھ ہمدردی ہے۔
