شمالی 24 پرگنہ میں کورونا کے معاملات میں اضافہ

بنگال کے شمالی 24 پرگنہ میں کورونا کے معاملے میں تیزی سے اضافہ ہورہا ہے، گزشتہ چوبیس گھنٹوں کے دوران چار ہزار 997 لوگوں میں کورونا کی تصدیق ہوئی ہے۔

مغربی بنگال میں کورونا وائرس کی دوسری لہر خطرناک شکل اختیار کر چکی ہے جس کے سبب کورونا کے نئے کیسز اور مرنے والوں کی تعداد میں ہر روز اضافہ ہو رہا ہے۔

مغربی بنگال کا تمام اضلاع کورونا وائرس کی زد میں ہے، لیکن شمالی 24 پرگنہ اس وبا کا مرکز بن چکا ہے اس کے بعد کولکاتا کورونا کے معاملے میں دوسرے نمبر ہے۔

ذرائع کے مطابق شمالی 24 پرگنہ میں گزشتہ چوبیس گھنٹوں کے دوران کورونا سے 33 لوگوں کی موت ہوئی ہے جبکہ چار ہزار 997 لوگوں میں کورونا کی تصدیق ہوئی ہے۔

محکمہ صحت نے شمالی 24 پرگنہ کے حالات پر تشویش کا اظہار کرتے ہوئے ضلع کی بگڑتی صورت حال پر پولیس انتظامیہ کو سخت ترین اقدامات کرنے کی ہدایت دی ہے۔ وہیں دوسری جانب ریاستی حکومت نے شمالی 24 پرگنہ کے تیزی سے بگڑتے حالات پر ضلع مجسٹریٹ، پولیس سپرنٹنڈنٹ اور محکمہ صحت کے سربراہ سے تفصیلی رپورٹ طلب کی ہے۔ واضح رہے کہ مغربی بنگال میں کورونا وائرس کے مریضوں کی کل تعداد دس لاکھ کے قریب پہنچ چکی ہے جبکہ اس بیماری سے اب تک 13 ہزار لوگوں کی اموات ہوئی ہے۔اس کے پیش نظر مغربی بنگال حکومت نے ریاست میں منی لاک ڈاؤن نافذ کر دیا ہے۔