مغربی بنگال کے چار اسمبلی حلقہ، جنوبی 24 پرگنہ کے گوسابا، شمالی 24 پرگنہ، ندیا کے شانتی پور اور کوچ بہار کے دن ہاٹا میں ضمنی انتخابات کے لیے ووٹنگ جاری ہے۔
گزرتے وقت کے ساتھ ساتھ ضمنی انتخابات کے لیے جاری ووٹنگ کے دوران مختلف اسمبلی حلقوں سے تشدد کے واقعات کی اطلاع موصول ہوئی ہے۔
اسی درمیان کھردہ اسمبلی حلقے میں ضمنی انتخابات کے دوران بی جے پی کے امیدوار کے شاہ نے ایک فرضی ووٹر کو پکڑلیا۔ اس سے علاقے میں سنسنی پھیل گئی۔
بی جے پی کے امیدوار کے شاہ نے کھردہ اسمبلی حلقے کے گھولہ تھانے علاقے میں واقع ششی ہائی اسکول میں ووٹنگ کے دوران ایک مشکوک شخص کو ووٹر آئی ڈی اور ووٹرز لسٹ دکھانے کو کہا جس میں وہ شخص ناکام ثابت ہوا۔ امیدوار نے فرضی ووٹر کو پکڑلیا اور ہنگامہ شروع کردیا۔
اس سے پولنگ بوتھ اور اس کے اطراف میں کشیدگی پھیل گئی۔ مرکزی فورسز اور پولیس نے حالات کو قابو میں کیا اور فرضی ووٹر کو اپنے تحویل میں لے لیا اور اس سے پوچھ گچھ کی۔
بی جے پی کے امیدوار کا کہنا ہے کہ 'حکمراں جماعت ترنمول کانگریس فرضی ووٹرز کی مدد سے انتخابات جیتنے کی کوشش کرتی آرہی ہے اور کھردہ میں بھی کچھ ایسا ہی دیکھنے کو ملا۔'
ترنمول کانگریس کے امیدوار اور وزیر شوبھن دیب ناتھ نے کہا کہ اس معاملے میں انہیں کچھ کہنا نہیں ہے۔ بی جے پی اپنے ہی پارٹی کے کارکنان کو فرضی ووٹر کے طور استعمال کر رہے ہیں۔'
- یہ بھی پڑھیں: تین لوک سبھا سمیت 30 اسمبلی سیٹوں پر آج ضمنی انتخابات
غورطلب ہے کہ مغربی بنگال کے چار اسمبلی حلقوں جنوبی 24 پرگنہ کے گوسابا،شمالی 24 پرگنہ کے کھردہ،ندیا کے شانتی پور اور کوچ بہار کے دن ہاٹا میں ضمنی انتخابات کے لئے ووٹنگ کا سلسلہ جاری ہے۔
چاروں اسمبلی حلقوں میں ضمنی انتخابات کے دودان سخت سکیورٹی انتظامات کیے گئے ہیں۔ اس کے لیے مرکزی فورسز، بی ایس ایف، ایس ایس بی اور مغربی بنگال پولیس کی خدمات حاصل کی گئی ہے۔
ذرائع کے مطابق جنوبی 24 پرگنہ کے گوسابا اسمبلی، شمالی 24 پرگنہ کے کھردہ اسمبلی اور ندیا ضلع کے شانتی پور میں پرامن طریقے سے ووٹ ڈالے جا رہے ہیں۔
