مغربی بنگال میں منعقد ہونے والے اسمبلی انتخابات 2021 سے قبل سیاسی جماعتوں کی جانب سے امیدواروں کے ناموں کے اعلان کا سلسلہ جاری ہو گیا ہے۔ حکمراں جماعت ترنمول کانگریس سمیت دیگر اپوزیشن جماعتوں کانگریس، لفٹ فرنٹ اور انڈین سیکولر فرنٹ اتحاد نے امیدواروں کے ناموں کا اعلان کیا۔
ترنمول کانگریس کی سربراہ ممتا بنرجی کی جانب سے اعلان کردہ امیدواروں کی فہرست میں قصبہ اسمبلی حلقے سے سینئر رہنما اور وزیر جاوید احمد خان کو ایک بار پھر امیدوار بنایا گیا ہے۔
امیدواروں کے ناموں کا اعلان ہوتے ہی توپسیا اور اس کے اطراف کے علاقوں میں رہنے والی خواتین سینئر رہنما جاوید احمد خان کو مبارکباد اور نیک خواہشات پیش کرنے کے لئے ان کے پارٹی دفتر پہنچیں۔
خواتین نے ترنمول کانگریس کے رہنما جاوید احمد خان کو گلدشتہ پیش کیا اور انتخابی جنگ میں ان کی ہر ممکن مدد کرنے کی یقین دہانی کرائی۔
خواتین کا کہنا ہے کہ ترنمول کانگریس کے مقبول ترین رہنماؤں کی فہرست میں جاوید احمد خان کا نام ٹاپ پانچ میں شامل ہے۔ انہوں نے کہا کہ ترنمول کانگریس کے رہنما ہمارے علاقے کے لیے اہم ہیں اور مستقبل میں بھی رہیں گے۔ ان کی موجودگی ہمارے لئے سرپرست سے کم نہیں ہے۔
خواتین کا کہنا ہے کہ جو شخص عام لوگوں کی مدد کرتا ہے اور ان کے دکھ درد کو سمجھتا ہے ان کے لیے ہم مر مٹنے کے لئے تیار ہیں۔
انہوں نے کہا کہ کیونکہ ایک عام آدمی جب مدد کی فریاد لے کر جاوید احمد خان کے دروازے پر جاتا ہے تو وہ نہ صرف مجبور انسان کی مدد کرتے ہیں بلکہ حوصلہ افزائی کے لئے انہیں گلے سے لگاتے ہیں۔
دوسری طرف ریاستی وزیر اور سینئر رہنما جاوید احمد خان نے ای ٹی وی بھارت سے گفتگو کرتے ہوئے کہا کہ خواتین کی حمایت میرے لئے حوصلہ افزائی ہے۔ اس کے لئے ان کا بہت بہت شکریہ۔
انہوں نے کہا کہ اسمبلی انتخابات کے لئے ترنمول کانگریس کے اعلان کردہ امیدواروں کی فہرست میں مسلمانوں کی تعداد کم نہیں ہے۔
انہوں نے کہا کہ اس پر اعتراض نہیں کیا جا سکتا ہے۔ ممتا بنرجی جو بھی کام کرتی ہیں خوب سوچ سمجھ کر تی ہیں۔ ان کی حکمت عملی کامیاب ہو گی۔
اسمبلی انتخابات کی تاریخوں کے اعلان کے بعد حکمراں جماعت ترنمول کانگریس سمیت تمام اپوزیشن جماعتوں کی جانب سے اپنے اپنے امیدواروں کے ناموں کے اعلان کا سلسلہ شروع ہو چکا ہے۔
واضح رہے کہ مغربی بنگال میں 294 سیٹوں کے لئے اسمبلی انتخابات اس مرتبہ آٹھ مراحل میں ہوں گے۔ 27 مارچ کو پہلے مرحلے میں ووٹ ڈالے جائیں گے۔
گزشتہ اسمبلی انتخابات میں ممتا بنرجی کی قیادت والی حکمراں جماعت 294 میں سے 211 سیٹیں جیت کر اقتدار میں آئی تھی۔
مزید پڑھیں:
متھن، وزیر اعظم کی بریگیڈ ریلی میں شریک ہوں گے
الیکشن کمیشن نے اسمبلی انتخابات کے مدنظر ریاست کے تمام اضلاع میں مرکزی فورسز کی تعیناتی کو لازمی قرار دیا ہے۔ مرکزی فورسز کے جوانوں نے مختلف اضلاع میں بوٹ مارچ شروع کر دی ہے۔
