مغربی بنگال کے گورنر جگدیپ دھنکر نے تمام مخالفت کے باوجود کوچ بہار کے شیتل کوچی کا دورہ کیا اور مقامی باشندوں سے ملاقات کی۔
اس دودان گورنر جگدیپ دھنکر کو چند لوگوں کی مخالفت کا سامنا کرنا پڑا، چند لوگوں نے گورنر کو سیاہ جھنڈے دکھائے۔
گورنر مغربی بنگال جگدیپ دھنکر نے تمام مخالفت کو درکنار کرتے ہوئے سیاسی جماعتوں کے حامیوں کے درمیان خونی جھڑپوں سے متاثر علاقوں کا دورے کر کے مقامی باشندوں سے ملاقات کی اور ان سے تبادلہ خیال کیا۔
گورنر جگدیپ دھنکر کے شیتل کوچی پہنچنے پر مقامی لوگ خاص طور پر خواتین جذباتی ہو گئیں اور انہیں پکڑ کر رونے لگیں۔
دورے سے قبل گورنر جگدیپ دھنکر اور وزیراعلیٰ ممتا بنرجی کے درمیان لفظی جنگ عروج پر پہنچ گئی ہے، دونوں ایک دوسرے کے کاموں میں مداخلت کرنے کا الزام عائد کیا۔
ترنمول کانگریس کی سربراہ اور ممتا بنرجی نے دو ٹوک الفاظ میں کہہ دیا تھاکہ گورنر کو ریاست کے کسی ضلع کا دورہ کرنے کے تعلق سے ریاستی حکومت کو اطلاع دینی پڑے گی، انہیں پروٹوکول پر ہر حال میں عمل کرنا ہی پڑے گا۔
اس کے جواب میں گورنر جگدیپ دھنکر نے وزیراعلیٰ ممتا بنرجی کو خط لکھتے ہوئے کہا کہ گورنر ریاست کا آئینی سربراہ ہوتا ہے، وہ آئین کے دائرے میں رہ کر عوام کی خدمت انجام دے سکتا ہے۔
اس کے بعد گورنر جگدیپ دھنکر اور ترنمول کانگریس کے رہنماؤں کے درمیان لفظی جنگ شروع ہو گئی ہے۔
