مغربی بنگال کے دارالحکومت کولکاتا سمیت مختلف اضلاع میں مانسون سے چند دنوں قبل ہی تیز ہواؤں کے ساتھ بارش کا سلسلہ جاری ہے۔
علی پور محکمہ موسمیات کے مطابق مختلف اضلاع میں تیز ہواؤں کے ساتھ بارش کا سلسلہ آئندہ چند دنوں تک جاری رہنے کا امکان ہے۔
اسی درمیان مغربی بنگال کے مشرقی مدنی پور ضلع کے گھوڑ گھر گرام میں موسلادھار بارش کے دوران آسمانی بجلی گرنے سے چار افراد کی موت ہو گئی جبکہ ایک شخص پوری طرح سے جھلس گیا۔
وہیں درگاپور تھانے کے ایک سینئر پولیس آفیسر کا کہنا ہے کہ آسمانی بجلی گرنے کا واقعہ پیش آیا ہے، اس واقعے میں چار لوگوں کی موت ہوئی ہے جبکہ ایک شدید طور پر جھلس گیا ہے۔
پولیس نے کہا کہ اس واقعہ میں ہلاک ہونے والوں کی شناخت رنجیت، گائلی، کشور، اروپ باگ اور ادھیر ملک کے طور پر ہوئی ہے، زخمی ہونے والے شخص کی شناخت رنجیت گائن کے طور پر ہوئی ہے۔
مشرقی بردوان ضلع انتظامیہ کا کہنا ہے کہ آسمانی بجلی کی زد میں آکر ہلاک ہونے والوں کے اہل خانہ کو دو دو لاکھ روپے اور زخمی ہونے والے شخص کو 50 ہزار روپے کے چیک دیے گئے ہیں۔
انہوں نے کہا کہ اس واقعے میں ہلاک ہونے والوں کے اہل خانہ کو وزیراعلیٰ ممتا بنرجی کا منصوبہ گھر گھر راشن کے تحت کھانے پینے کا سامان دیا جائے گا۔
