مغربی بنگال میں ہونے والے اسمبلی انتخابات سے قبل حکمراں جماعت ترنمول کانگریس اور بی جے پی کے رہنماؤں کے درمیان متنازع بیان بازی اور اشتعال انگیزی کا سلسلہ جاری ہے۔
اسمبلی انتخابات کی تاریخ جوں جوں قریب آ رہی ہے توں توں لفظی جنگ میں شدت آتی جا رہی ہے۔
ترنمول کانگریس کے قومی جنرل سکریٹری پارتھو چٹرجی نے کہا کہ بی جے پی اقتدار پر قبضہ کرنے کے لئے تمام حدیں پار کر دی ہیں۔
انہوں نے کہا کہ انتخابی مہم کے دوران بی جے پی کے رہنماؤں نے جس طرح کی زبان استعمال کی ہے وہ قابل مذمت ہے۔ انتخابات کے نتائج جو بھی ہوں لیکن ایک بات طے ہے کہ عام لوگوں کے جذبات کو ٹھیس پہنچانے کی کوشش کی جا رہی ہے۔
دوسری طرف اسمبلی میں بایاں محاذ کے رہنما سوجن چکرورتی نے ترنمول کانگریس اور بی جے پی پر بنگال کی تہذیب اور ثقافت سے کھلواڑ کرنے کا الزام لگایا۔
انہوں نے کہا کہ مغربی بنگال میں جو کچھ بھی ہو رہا ہے، اس کی ذمہ دار ترنمول کانگریس اور بی جے پی ہے۔ ان دونوں کی وجہ سے مقامی تہذیب اور ثقافت پر خطرے کا بادل منڈلانے لگا ہے۔
